د جلال اباد امنيت ساتلو مسئوليت د ملي اردو ځواکونو ته وسپارل شو
د ایکنا راپور له مخې، د پارس ټوډۍ نه په نقل،دوی وايي، دا پرېکړه په جلال اباد کې د وروستيو ترهګريزو بريدونو له رامنځته کېدو وروسته د خلکو د ژوند خونديتابه په موخه شوې ده.
روان کال په دغه ښار کې نږدې لس لويې ډله ييز بريدونه شوي، چې تر ټولو وروستی يې تېره ورځ د دغه ولايت د کډوالو چارو پر رياست ډله ييز بريد و.
په دغه بريد کې چې پرون غرمه شاوخوا دولس بجې پيل او د مازيګر تر ۵ بجو او ۱۵ دقيقو يې دوام وکړ، د يوې مېرمنې په ګډون په کې ۱۵ کسان ووژل شول او د دوو مېرمنو په ګډون په کې ۱۵ نور ټپیان شول.
د ننګرهار د والي وياند عطاء ا... خوګیاڼي وويل، چې د دغه ولايت مرکز جلال اباد ښار کې د وروستيو امنيتي پېښو له امله د ننګرهار والي د ۲۰۱ سيلاب قول اردو له قوماندان سره په ګډه پرېکړه وکړه، چې د ښار امنيت به ملي اردو ځواکونه ساتي.
هغه د ننګرهار د والي له قوله وويل: ((د ننګرهار د والي او د دې ولایت د اوسیدونکي په توګه راته نور د دې ولایت په مرکز جلال اباد ښار کې روان امنیتي وضعیت د قناعت او منلو وړ ندی،په همدې موخه مو د قول اردو قوماندانۍ په همکارۍ د جلال اباد ښار لپاره بېړني او ځانګړي امنیتي تدابیر ونیول، امید لرم،چې موږ به په وروستیو تدابیرو سره د ښار وضعیت کې د پام وړ بدلون رامنځته کړو.))
په همدې حال کې د نظر خاوندان ملي اردو ته د امنيت سپارلو ترڅنګ غوښتنه کوي، چې دلته دې چاڼيز عمليات هم پيل شي، څو دلته موجود وسله وال هم ختم شي.
د چارو کارپوه همايون امان وويل، یواځې ملي اردو ته د امنيت په سپارلو کار نه کیږي، وسله وال همدلته خوندي ځایونه لري. بايد چاڼيز عمليات هم پيل شي.
عام خلک هم خوښ دي، چې د ښار امنيت د ملي اردو ځواکونو ته سپارل شوی، ځکه دوی وايي، ملي اردو په افغانستان کې يواځينی ارګان دی، چې له زړه کار کوي.
ښاريان هم ملي اردو ته د امنيت سپارلو ترڅنګ د پراخو چاڼيزو عملياتو د پيل غوښتنه کوي او وايي، هېڅ ځای بايد له تالاشۍ پاتې نه شي.
په جلال اباد ښار کې ملي اردو ته د امنيت سپارلو او بيا دلته د وسله والو د موجوديت اندېښنې په داسې حال کې غبرګېږي، چې څو ورځې وړاندې د دغه ولايت والي حيات ا... حيات له رسنيو سره په خبرو کې ومنله، چې د ښار په ګډون بېلابېلو ولسواليو کې طالب، داعش او حتی د القاعدې ډلې وسله وال موجود دي.
http://parstoday.com/ps/news/afghanistan-i75219
