İtaliyada dinlərarası dialoqa dair ilk milli nizamnamə hazırlanıb
“İQNA”-nın "italiatelegraph"-a istinadən verdiyi məlumata görə, İtaliyanın dinlərarası dialoq üzrə ilk milli nizamnaməsi ölkənin 15 dini qrupunu bir araya gətirir. Bu tarixi addım sülh, sosial birlik və mülki dəyərlərin gücləndirilməsi üçün əməkdaşlıqda yeni bir mərhələnin əsasını qoyur.
25 iyun 2026-cı ildə Roma öz növündə ilk olan və İtaliyadakı on beş dini icmanı ortaq bir sənəd ətrafında birləşdirən "Dinlərarası dialoq üçün İtalyan yolu" nizamnaməsinin rəsmi imzalanma mərasiminə şahidlik edib. Bu hadisə 2023-cü ildən başlayan və dialoq mədəniyyətinin yaradılması, qarşılıqlı hörmətin təşviqi və dini qurumlar arasında İtaliya cəmiyyətinə xidmət edəcək əməkdaşlığın genişləndirilməsini hədəfləyən üç illik iclas və müzakirələrdən sonra baş tutub.
Nizamnamə dini müxtəlifliyi İtaliya cəmiyyəti üçün müsbət bir dəyər kimi təsdiqləyən baxışa əsaslanır və dinlərarası dialoqu etimadın yaradılması, birgə yaşayışın təşviqi, nifrət nitqi, ekstremizm və ayrı-seçkiliklə mübarizə üçün əsas vasitə hesab edir.
Sənəd, həmçinin dialoqu qarşılıqlı hörmət və əməkdaşlığa əsaslanan davamlı və institusional bir fəaliyyətə çevirən, ortaq iradəni İtaliya cəmiyyətinə xidmət edən konkret proqram və təşəbbüslərə çevirməyi hədəfləyən bir sıra prinsip və praktiki öhdəlikləri də əhatə edir.
İtaliya İslam Mədəniyyət Mərkəzi və Roma Böyük Məscidi bu milli tədbirdə iştirak edib və mərkəzin rəhbəri Nəim Nəsrullah nizamnaməni bu qurum adından imzalayıb.
Roma Böyük Məscidinin imamı Nadir Əqqad vurğulayıb ki, bu nailiyyət üç illik iclas, dialoq və davamlı işin məhsuludur. O, İtaliyada dinlərarası dialoq üzrə ilk milli nizamnamənin imzalanması ilə nəticələnən bu prosesdə iştirak etməkdən qürur duyduğunu bildirərək qeyd edib ki, bu addım müxtəlif dinlərin nümayəndələri arasında əməkdaşlığın yeni mərhələsinin başlanğıcıdır və yolun sonu deyil.
İmzalanma mərasimindən sonra İtaliya Prezidenti Sercio Mattarella nizamnaməni imzalayan dini qrupların nümayəndələrini Kvirinal sarayında qəbul edib və sənədin rəsmi nüsxəsini təhvil alıb. Bu addım İtaliya hökumətinin dinlərarası dialoqa rəsmi dəstəyini nümayiş etdirir və onu sosial birliyin təməl daşı və birgə yaşayış mədəniyyətinin təşviqi hesab edir.
Nizamnamə İtaliyadakı çoxsaylı dini liderləri və qurumları dialoq və əməkdaşlıq baxışı ətrafında birləşdirən ilk ortaq milli sənəddir. O, dinlərarası dialoqun sosial çətinliklərlə mübarizəyə və sülh, hörmət və əməkdaşlıq dəyərlərinin möhkəmlənməsinə kömək edən daimi institusional çərçivəyə çevrildiyi yeni bir mərhələ yaradır.
Qeyd edək ki, əhalisi təxminən 59 milyon olan İtaliyada təqribən 2,8 milyon müsəlman yaşayır ki, bu da ümumi əhalinin təxminən 4,7 faizini təşkil edir. Roma Böyük Məscidi və İtaliya İslam Mədəniyyət Mərkəzi ölkədə dövlət qurumları və digər dini təşkilatlarla dialoqda, habelə müsəlmanların ictimai həyatda iştirakının təşviqində mühüm rol oynayan ən görkəmli İslam qurumlarıdır.
4360804
