“İQNA”-nın "Bernama"ya istinadən verdiyi məlumata görə, Malayziyanın Baş naziri Ənvər İbrahim əlavə edib: "Bu mərasimlər müsəlmanlara ilham vermək, onlara yeni ruh bəxş etmək, məlumatlılığı artırmaq və onlarda dərin anlayış yaratmaq üçün bir platforma olmalıdır."

O, Peyğəmbərin (s) mövludu mərasimindəki çıxışında deyib: "İslamın tanınması və dərk olunması sahəsində əsas çətinlik onun icra edilməsi və bizim İslama baxış tərzimizdir. Malayziyanın müstəqillik bayramları kimi, burada da məsələ yalnız şənlik, mərasim və ya toplantıdan ibarət deyil; hər şeydən vacibi, Uca Allahın əmrlərinə riayət etməkdir."

O əlavə edib: "Mənim fikrimcə, bu mərasimlərin məqsədi mövcud vəziyyətlə kifayətlənmək və keçmişin qafilliyini davam etdirmək deyil, yeni bir ruh yaratmaqdır. İslamın məşəli hələ də dinamik və canlıdır və Həzrət Məhəmmədin (s) həyatının hər bir hissəsi bizə bir dərsdir."

Ənvər İbrahim deyib: "Bu gün müsəlmanların qarşısında duran çətinlik İslam dəyərlərini daxililəşdirmək və təkcə müsəlmanlar üçün deyil, bütün malayziyalılar və dünya ictimaiyyəti üçün layiqli bir nümunə olmaqdır."

O bildirib ki, "aləmlərə rəhmət" (Rəhmətən lil-aləmin) konsepsiyası dəyərlər, prinsiplər və ideallar əsasında qurulmuş bir cəmiyyətin yaradılmasında özünü göstərməlidir; elə bir cəmiyyət ki, eyni zamanda yüksəliş və üstünlük yolunda irəliləyir.

Ənvər İbrahim qeyd edib: "Həzrət Məhəmmədin (s) öyrətdiyi prinsiplər əsasında qurulmuş bir cəmiyyət xeyirxahlığı qəbul etmək, başqalarına hörmət etmək və ədaləti bərqərar etmək kimi aydın dəyərləri qorumalı, bunun əksinə olaraq, korrupsiya, pis rəftar, sosial bəlalar, təkəbbür, dar düşüncəli irqçilik, zülm, maliyyə fırıldaqları və vəzifə səlahiyyətlərindən sui-istifadə hallarını rədd etməlidir."

O, çıxışının davamında sual edib: "Necə edə bilərik ki, Malayziyanın müsəlman və malay cəmiyyətlərini Həzrət Məhəmmədin (s) öyrətdiyi prinsiplər əsasında yüksəliş yolunda gedən fərqli, unikal və seçilən bir cəmiyyətə çevirək?"

O bildirib ki, "bu, Həzrət Məhəmmədin (s) mövludunu qeyd edərkən üzləşdiyimiz imtahan və çətinlikdir. Bu hadisə şənliklər, yürüşlər və ya mərasimlərlə məhdudlaşmamalı, əksinə, düşüncəyə və daha dərin dərk etməyə ilham verməlidir. Mənim nümunəvi və əhatəli cəmiyyət dedikdə nəzərdə tutduğum budur."

Ənvər İbrahim əlavə edib: "İslam dəvəti və təbliğat fəaliyyətlərinə indiki yanaşma daha çox diqqət tələb edir, xüsusən də dini mesajların çatdırılmasının anlayışı və qəbulu artırdığına əmin olmaq üçün."

Malayziya Baş naziri sonda deyib: "İslam dəvəti sahəsindəki bugünkü səylərimizə baxdıqda görürük ki, bəzi insanlar İslamı qəbul etmək istəyini itirir. Bu, ən yaxşı nümunə hesab etdiyimiz Həzrət Məhəmmədin (s) təqdim etdiyi nümunədən fərqlidir. Bu, hamımız üçün bir xatırlatmadır ki, necə öz fəaliyyətimizi yaxşılaşdıra bilərik?"

4371856