“İQNA”-nın "Əl-Cəzirə"yə istinadən verdiyi məlumata görə, Qətərin BMT-dəki səfiri və nümayəndəsi Əliyyə Əhməd Seyf Ali-Sani ərəb ölkələri qrupu adından çərşənbə günü yerli vaxtla (ABŞ-ın şərq sahili) BMT Təhlükəsizlik Şurasının Yaxın Şərq və Fələstin vəziyyəti ilə bağlı keçirilən iclasında çıxış edərək, fələstinlilərin öz müqəddəratını təyin etmək hüququna riayət edilməsinin vacibliyini vurğulayıb.
BMT-dəki ərəb qrupunun nümayəndəsi Fələstin dövlətini rəsmən tanıyan ölkələrin sayının artmasını alqışlayıb.
Ali-Sani, eyni zamanda, İsrailin bütün işğal altındakı Fələstin ərazilərindəki "kobud və davamlı pozuntularını", o cümlədən İsrailin hərtərəfli plana və Fələstin dövlətinin qurulmasına qarşı çıxmasını qınayıb.
Qətərin BMT-dəki səfiri vurğulayıb: "Bu addım hərtərəfli planın birbaşa rədd edilməsidir, onun icrasını təhlükə altına qoyur və ədalətli və davamlı sülhə nail olmaq üçün kollektiv səyləri kökündən zəiflədir."
Ərəb ölkələri qrupunun nümayəndəsi həmçinin hərtərəfli planın tam şəkildə icra edilməsini tələb edib.
Bundan əvvəl Fələstin muxtariyyətinin nümayəndəsi Riyad Mənsur Təhlükəsizlik Şurasının bu iclasında deyib: "İsrail açıq şəkildə Fələstin dövlətini məhv etməkdə qərarlıdır. İlhaq (torpaqların qatılması) uzun müddətdir davam edir, lakin İsrail hazırda E1 planı ilə bağlı tenderlər elan etməklə tam və genişmiqyaslı ilhaq sahəsində qırmızı xətti keçib."
Fələstin dövlətinin BMT-dəki daimi müşahidəçisi bildirib: "İsrail açıq şəkildə bəyan edib ki, bu tenderlərin məqsədi Fələstin dövlətini məhv etmək və məskunlaşanların (settler) hökumətinin qələbəsidir. Onlar ilhaqın regionumuzda istənilən sülh perspektivini məhv edəcəyinə əhəmiyyət vermirlər. Bu, məhz onların məqsədidir; çünki onların müstəmləkəçi genişlənmə aclığı öz xalqlarına duyduqları narahatlıqdan qat-qat çoxdur."
Onun sözlərinə görə, İsrail digər tərəfdən ABŞ Prezidenti Donald Trampın addımlarını və Mənsurun "Prezident Trampın ilhaqa qarşı açıq siyasətini" özündə əks etdirdiyini dediyi "hərtərəfli planın" icrasını pozmağa çalışır.
"Onların məqsədləri aydındır" deyən Mənsur, E1 planını və məskunlaşma sistemini pisləyən bütün ölkələrə təşəkkür edib və Təl-Əvivin bu birtərəfli və qeyri-qanuni addımlardan geri çəkilməsini tələb edərək deyib: "Biz bütün ölkələri Beynəlxalq Ədalət Məhkəməsinin müəyyən etdiyi kimi beynəlxalq hüquq qarşısındakı öhdəliklərinə əməl etməyə, o cümlədən ilhaqı tanımamağa, fərq qoymağa, kömək etməkdən çəkinməyə, məsuliyyət daşıyanları cavabdeh tutmağa və Fələstin xalqının öz müqəddəratını təyin etmək hüququnu dəstəkləməyə çağırırıq."
O, həmçinin Təhlükəsizlik Şurasının Fələstin xalqının müstəqil dövlətə sahib olmaq hüququ daxil olmaqla, öz müqəddəratını təyin etmək hüququnu dəstəkləyən çoxsaylı qətnamələrinin tam icrasını tələb edib. Mənsur vurğulayıb ki, hazırkı İsrail kabineti özünü "güc" adlandırdığı vasitələri müdafiəsiz insanlara qarşı yönəltməyə həsr edib və hətta onlara yardım etməyə çalışan BMT əməkdaşlarına və humanitar qüvvələrə qarşı belə vəzifələrini yerinə yetirmir.
Mənsur sözlərini belə yekunlaşdırıb: "Yaxın Şərq əbədi müharibəyə məhkum deyil. Əgər biz bu gün birlikdə hərəkət etsək, fərqli bir gələcək mümkündür."
BMT-nin Yaxın Şərq sülh prosesi üzrə xüsusi koordinatorunun müavini Ramiz Ələkbərov da çərşənbə günü səhər Təhlükəsizlik Şurasının işğal olunmuş Fələstin ərazilərindəki vəziyyətlə bağlı iclasında əlavə edib: "2803 (2025) saylı qətnamənin icrası və Qəzzada münaqişəyə son qoyulması ilə bağlı hərtərəfli plan barədə danışıqlar davam etsə də, atəşkəs hələ də kövrəkdir."
BMT rəsmisi bildirib: "Qəzza əhalisinin acınacaqlı vəziyyətinin həlli də əsas əhəmiyyət kəsb edir. Onlar ümidlərini itirirlər. İsrailin Qəzzaya hava hücumları bir həftəlik fasilədən sonra avqustun 12-də yenidən başlayıb, hərbi fəaliyyətlər, o cümlədən atəşə tutma, dron hücumları və yerüstü əməliyyatlar isə heç vaxt dayanmayıb. Qəzzanın Səhiyyə Nazirliyinin məlumatına görə, hesabat dövründə 100-dən çox fələstinli öldürülüb, 400-dən çox insan yaralanıb."
Ələkbərov davam edib: "Qəzzanın təxminən üçdə ikisi hələ də əlçatmazdır və ya ciddi giriş məhdudiyyətləri ilə üzləşir. Atəşkəsdən 10 aydan çox vaxt keçməsinə baxmayaraq, 2026-cı il üçün təcili humanitar yardım çağırışının yalnız 40%-i qarşılanıb və bu vəziyyət qəbuledilməzdir."
4372282
