“İQNA”-nın “Acil”ə istinadən verdiyi xəbərə görə, bu Quran səhifəsi tarixi əsər kimi Allahın Kitabının əsrlər boyunca yazılması və qorunub saxlanmasının ilkin mərhələlərini sənədləşdirir.

Bu əlyazma Quranın “Məryəm” surəsinin bir hissəsini əhatə edir və qırmızı mürəkkəblə dəri üzərində yazılıb. Bu nadir Quran mətnində Quranın yazıya alınmasının ilkin mərhələlərində geniş yayılmış hərəkə və nöqtələmə işarələri yoxdur.

Bu xüsusiyyət əsərə özünəməxsus tarixi və elmi dəyər qazandırır. Onun nümayiş etdirilməsi ziyarətçilərə İslamın ilk əsrlərində Quran yazısının təkamül prosesini yaxından tanımaq imkanı verir.

Muzey rəsmiləri vurğulayıblar ki, bu əlyazma özünəməxsus xüsusiyyətlərinə görə xüsusi əhəmiyyət daşıyır. Dəri Quranın yazıya alındığı ilkin dövrlərdə onun köçürülməsi üçün əsas materiallardan biri olub. Həmçinin nöqtə və hərəkələrin olmaması Quranın yazıya alınması tarixində, sonrakı dövrlərdə hərəkə və hərfləri bir-birindən fərqləndirən işarə sistemlərinin inkişafından əvvəlki ilkin mərhələni göstərir.

Bu nadir əsər Kral Fəhd Milli Kitabxanasında qorunub saxlanılır. Onun muzeydə nümayiş etdirilməsi ziyarətçilərə vəhy kəlamına göstərilən diqqətin tarixini əks etdirən Quranın orijinal nümunəsini görmək imkanı verir. Eyni zamanda, Quran əlyazmalarının Allahın Kitabının yazıya alınması və qorunub saxlanılması tarixinin sənədləşdirilməsindəki elmi və mədəni dəyərini nümayiş etdirir.

Quran-i Kərim Muzeyi Məkkədəki Hira (Həra) Mədəniyyət Bölgəsində yerləşən bir layihədir. Muzey hərtərəfli təhsil və interaktiv təcrübə təqdim etməklə Quran-i Kərimin tarixini izah edir və vəhyin nazil olma mərhələlərini orijinallıqla müasir texnologiyaları birləşdirən müasir üslubda nümayiş etdirir.

Bu muzeydə Quran-i Kərimin yazıya alınmasının tarixi, Quran elmləri və müxtəlif dövrlər ərzində onun qorunub saxlanılması istiqamətində göstərilən səylər də daxil olmaqla, müxtəlif mövzulara həsr olunmuş ixtisaslaşmış bölmələr fəaliyyət göstərir. Bundan əlavə, burada nadir əlyazmalar və müxtəlif yaş qrupları arasında maarifləndirməni asanlaşdıran və anlayışı artıran interaktiv izahlar nümayiş etdirilir.

Muzey Səudiyyə Ərəbistanının daxilindən və xaricindən gələn ziyarətçiləri qəbul edir və müasir üsulla Quranın tarixinə dair məlumatlılığın artırılmasında mühüm rol oynayır. Muzeyə ziyarət həm tədris, həm də mənəvi baxımdan əhəmiyyətli bir təcrübə hesab olunur.

4373018