"İQNA"nın "Masrawy" saytına istinadən verdiyi məlumata görə, Misirin Mənufiyyə vilayətinin Şühəda rayonunun "Mit Şəhalə" kəndindən olan 71 yaşlı Hacı Səna Əbdüssəttar əzm və Quranla dərin bağın bariz nümunəsidir.

O, bütün Quranı bir gündə (bir iclasda) əzbərdən oxuyub xətm edib; bu iş səhər namazından gün batana (məğrib) qədər davam edib.

Bu heyranedici nailiyyətin arxasında onilliklər əvvəl başlayan uzun bir yol dayanır. Hacı Səna iyirmi yaşlarının əvvəllərində Qurani-Kərimə dərin məhəbbət bəsləməyə başlayıb və Quran Radiosu bu səmavi kitabı əzbərləmək yolunda onun üçün açılan bir pəncərə olub.

Hacı Səna bildirir ki, Quranı əzbərləməyə erkən yaşlarda başlayıb; Quran Radiosunu fasiləsiz dinlədiyi üçün bu yola qədəm qoyub.

Bu misirli xanım deyir: "Bu, ilahi bir nemət idi; iyirmi yaşlarımın əvvəllərində onu əzbərlədim. Quran Radiosuna qulaq asmaq bu səmavi kitaba olan sevgini və onu əzbərləmək əzmini vücudumda kök saldırdı."

O, əzbərləmə yolunda irəliləyərkən eyni zamanda ailə həyatının məsuliyyətlərini və övlad tərbiyəsini də üzərinə götürmüşdü. Hacı Səna üç oğul anasıdır: Məhəmməd (50 yaş), Mahmud (45 yaş) və əczaçı olan doktor Mustafa (42 yaş).

Ev işləri və övlad tərbiyəsinin məşğuliyyətinə baxmayaraq, o, həmişə Quran üçün vaxt ayırmağa çalışırdı və "Nəhl" surəsini əzbərləməyə nail olmuşdu, lakin bu yol həyat yoldaşının xəstəliyi səbəbindən dayandı.

Hacı Səna həyat yoldaşının altı aylıq xəstəliyi dövründə ona qulluq etdiyi üçün Quranı əzbərləmə prosesini dayandırmışdı. Həyat yoldaşının vəfatından sonra da çətin bir dövr keçirdi ki, bu da Quranı əzbərləməyə davam etməsinə mane olurdu.

Bununla belə, bu fasilə onun yolunun sonu deyildi. Nəhayət, Hacı Səna yenidən Qurana üz tutdu və onu əzbərləmək və təkrar etmək üçün ona kömək edəcək birini axtardı.

Hacı Sənanın yolu sadəcə əzbərləməkdən daha üstündür; o, müxtəlif yaşda olan iyirmidən çox başqa xanımla birlikdə təkrar və oxunuş sessiyalarında iştirak edir; Allahın kitabından əzbərlədikləri hissələri oxumaq və təkrarlamaq üçün bir yerə toplaşan xanımlar.

Onun həmsöhbətləri arasında savadsız olmasına baxmayaraq Quranı əzbərləmiş bir qonşusu və dostu da var. Onlar böyük ciddiyyət və səylə ayələri oxuyur və təkrar edirlər; Allahın kitabına olan ortaq sevgiləri onları bir-birinə bağlayıb.

Hacı Sənanın Quran yolundakı ən parlaq anlarından biri onun Quran xətm etmə iclasında iştirakı olub; o, sübh namazından sonra oxumağa başlayıb və gün batana qədər davam edərək bütün Qurani-Kərimi təkrar oxuyub.

Hacı Səna izah edir: "Biz uyğun bir sürətlə oxuyurduq və bu iş bir tam gün çəkdi".

O, nailiyyətini öz zirəkliyinin və ya zəkasının nəticəsi hesab etmir və deyir: "Bu nə mənim zirəkliyimdəndir, nə də zəkamdan; bu, Allahın köməyidir."

2024-cü ildə Hacı Səna həcc ziyarətinə getmək şərəfinə nail oldu və bu, onun Qurana olan daimi sevgisi və Allaha yaxınlaşmaq istəyi ilə mənalanan yolunda başqa bir dönüş nöqtəsi oldu.

4373287