Yawan Musulman Spain ya ninka sau 10 a cikin shekaru 30 da suka gabata

Sakataren kwamitin muslunci na kasar Spain, yayin da yake jaddada gagarumin ci gaban al'ummar musulmi a wannan kasa cikin shekaru 30  da suka gabata, ya bayyana cewa: Musulman kasar Spain suna isar da sakon jaddada hadin kai na addini ta hanyar shigar da makwabtansu wadanda ba musulmi ba a cikin bukukuwan watan Ramadan.

A rahoton Anatoly, Mohammad Ajana Elwafi, sakataren kwamitin Musulunci a kasar Spain, ya ce adadin musulmin kasar ya karu sau 10 cikin shekaru talatin da suka gabata.

Ya fayyace cewa: Alkalumman hukuma na yanzu sun nuna cewa adadin musulmi a kasar Spain ya kai miliyan 2.5, yayin da wasu alkaluma da ba na hukuma ba suka kiyasta adadinsu ya kai kusan miliyan uku.

Al-Wafi ya kara da cewa: A da mafi yawan musulmi bakin haure ne, amma a halin yanzu wani kaso na musulmin ‘yan asalin kasar Spain din ne.

Ya kara da cewa: Kimanin 'yan kasar Spain miliyan daya musulmi ne, wasu daga cikinsu sun samu takardar zama yan kasar Spain, wani bangare kuma yan asalin kasar ne.

Sakataren kwamitin Musulunci a kasar Spain ya jaddada cewa: Yawancin musulmin kasar Spain sun fito ne daga kasashen Morocco, Aljeriya, Tunisia, Mauritania, Libya, Pakistan da Senegal, kuma galibinsu suna zaune ne a yankunan Catalonia, Valencia, Andalusia, da Madrid.

4130027