Wanafunzi wa alimu na mwalimu huyo mashuhuri wa Qur’ani, Sheikh Mahmoud Aslani (Mullah Mahmoud), walikusanyika katika mji wa Tetovo ulioko kaskazini-magharibi mwa Macedonia Kaskazini ili kutoa heshima zao kwa kumbukumbu yake adhimu.

Kongamano hilo lilifanyika chini ya uangalizi na uongozi wa Mufti wa Tetovo, Sheikh Hafidh Selver Efendi Xhemili, na lilihudhuriwa na zaidi ya wanafunzi 100 wa kike na wa kiume kati ya jumla ya wanafunzi 202 waliopata fursa ya kuhifadhi Qur’ani kikamilifu chini ya mikono ya Sheikh Aslani.

Jumuiya ya Kiislamu ya Tetovo ilitangaza kwamba mkusanyiko huu adhimu wa Mahafidh wa Qur’ani utafanywa kuwa ada na utamaduni wa kila mwaka, ukiwakutanisha wanafunzi hao wa chuo cha Qur’ani na kudumisha mfungamano imara wa kiroho na kielimu kati ya vizazi na mwalimu wao.

Katika hafla hiyo adhimu, kilitangazwa pia kuanzishwa rasmi kwa Taasisi ya Kuhifadhisha Qur’ani Tukufu, hatua inayoashiria upanuzi na mwendelezo wa miradi ya kijamii na kiroho inayolenga kukihudumia Kitabu cha Mwenyezi Mungu vizazi baada ya vizazi.

Marhum Sheikh Mahmud Efendi Aslani (1932–2021), mzaliwa wa mji wa Tetovo, alitoa mhanga maisha yake kwa takriban nusu karne, tangu mwaka 1967 hadi anarejea kwa Mola wake Mlezi, akifundisha na kuhifadhisha Qur’ani katika Msikiti maarufu wa kihistoria wa Šarena Džamija (Msikiti Uliorembwa). Chini ya uangalizi na malezi yake ya moja kwa moja, wanafunzi takriban 200 walitunukiwa daraja ya kuhifadhi Qur’ani nzima, huku maelfu ya wengine wakijifunza kisomo na qira’a sahihi ya Kitabu cha Mwenyezi Mungu.

Mnamo mwaka 2012, Shirika la Kimataifa la Kuhifadhisha Qur’ani Tukufu lililoko Jeddah lilimtunuku nishani ya heshima ya “Mwalimu Bora Zaidi Duniani” katika fani ya kuhifadhisha Qur’ani, likimtambua kama mmoja wa nguzo na shakhsia adhimu zaidi wa elimu ya Qur’ani katika eneo lote la nchi za Balkan.

Akihutubia mkusanyiko huo mjini Tetovo, Sheikh Hafidh Selver Efendi Xhemili alisisitiza kuwa kuhifadhi Qur’ani Tukufu si mwisho wa safari; kinyume chake, ni mwanzo wa kubeba amana na dhamana nzito ya kimaadili, ambapo athari yake inapaswa kudhihiri wazi katika mwenendo, usawa na uadilifu, pamoja na tabia njema za mhifadhi huyo katika jamii.

Alilifananisha kundi hilo la Mahafidh na shina la mti imara wenye matawi zaidi ya 200 yanayozaa matunda, huku akitaja jitihada za marhum Sheikh Aslani katika kufundisha Qur’ani kuwa ni Sadaka Yenye Kuendelea (Sadaqah Jariyah) isiyokatika ujira wake mbele ya Mwenyezi Mungu.

Kadhalika, Mufti alikumbusha changamoto na mashinikizo makubwa yaliyokuwepo katika miaka ya 1980, wakati ambapo mafundisho ya Qur’ani yalilazimika kufanyika kwa siri nyuma ya milango iliyofungwa chini ya ukandamizaji wa kiitikadi wa utawala wa kikomunisti, akisisitiza kuwa mazingira hayo magumu yalichangia pakubwa katika kujenga ukakamavu wa kiroho, subira, na nidhamu thabiti kwa vizazi hivyo vya mahafidh.

Mkusanyiko huo ulishuhudia pia uonyeshaji wa filamu ya maisha na kumbukumbu iliyoitwa “Kumbukumbu za Mullah Mahmoud,” iliyosimulia safari na masaibu ya mahafidh hao 202 wa kike na wa kiume waliohitimu chini ya mwamko wake. Washiriki walihitimisha hafla hiyo kwa kusoma Surah Al-Fatiha na kumuombea rehma marhum Sheikh Aslani pamoja na mahafidh wote waliotangulia mbele za haki, wakitukuza mchango wao usiofutika katika kukitetea, kukihudumia na kukieneza Kitabu Kitakatifu cha Mwenyezi Mungu.

3499012