Ба гузориши икна, бо истинод ба Атабаи Алавия, дар чаҳорчӯби барномаҳои ҳамроҳ бо Панҷумин Ҷашнвораи байналмилалии шеъри арабии Паёмбари Аъзам (с), шоирони араби ширкаткунанда аз саҳнҳои ҳарами муқаддаси Имом Алӣ (а) боздид намуда, бо барҷастатарин биноҳои таърихӣ ва осори меъмории дохили маҷмуаи ҳарам ошно шуданд.

Шоирони араби ширкаткунанда дар ин маросим ҳамчунин аз Китобхонаи Равзаи Ҳайдария ва Намоишгоҳи ҳунарҳои исломӣ боздид карданд.

Шоирон таассурот ва таҳсини худро аз ганҷинаҳои илмӣ, таърихӣ ва адабии мавҷуд дар Китобхонаи Равзаи Ҳайдария баён карданд, ки бозгӯкунандаи мероси арзишманди фикрӣ ва фарҳангӣ мебошад. Онҳо маҷмуаи китобҳо ва манбаъҳоеро, ки дар ҳифзи мероси исломӣ ва башарӣ саҳм доранд, ситоиш карданд.

Иштироккунандагон ҳамчунин аз Намоишгоҳи ҳунарҳои исломӣ ва наққошиҳою осори арзишманди ҳунарии он боздид карданд. Ин осор зебоӣ ва асолати ҳунари исломиро ба тасвир мекашанд. Онҳо инчунин аз биноҳои таърихӣ ва унсурҳои меъмории ҳудуди ҳарами муқаддаси Имом Алӣ (а) таҳсин карданд.

Ин чорабиниҳо бахше аз барномаҳои гуногуни Панҷумин Ҳафтаи байналмилалии «ас-Содиқайн» ба шумор мераванд. Ин ҳафта барномаҳои мухталифи қуръонӣ, фарҳангӣ, илмӣ, гуфтугӯӣ ва шеъриро дар бар мегирад. Ҳамчунин ба муносибати солгарди мавлуди Паёмбари Акрам (с) чорабиниҳои иҷтимоӣ дар наздикии ҳарами муқаддаси Алавӣ ва дар саросари шаҳри Наҷаф баргузор мешаванд.

Китобхонаи Равзаи Ҳайдария

Китобхонаи Равзаи Ҳайдария (китобхонаи ҳарами Имом Алӣ (а)) яке аз қадимтарин ва маъруфтарин китобхонаҳои шаҳри Наҷаф ба шумор меравад, ки дар саҳни ҳарами Амирулмуъминин (а) ҷойгир аст.

Ин китобхона, ки бо номҳои дигар низ маъруф мебошад, аз замонҳои қадим маҳалли нигаҳдории китобҳои нодир ва дастхатҳои нависандагону бузургон будааст. Аммо дар тӯли қарнҳои зиёд бар асари ҳаводис ва осебҳо бахше аз китобҳои он аз байн рафтаанд.

Пас аз поёни ҳукумати Саддом Ҳусайн, ин китобхона бо дастури Оятуллоҳ Систонӣ, марҷаи олии шиъаён дар Наҷаф, эҳё ва дубора боз гардид.

Имрӯз Китобхонаи Ҳайдария дорои имконоту бахшҳои гуногун буда, ҳамчун яке аз марказҳои муҳими нигаҳдорӣ ва ҳифзи мероси илмӣ, фарҳангӣ ва таърихии исломӣ фаъолият мекунад.

4373014