ایکنا نیوز- صدی البلد نیوز کے مطابق مصر کی وزارتِ اوقاف نے قرآنی مقابلے ’’دولتِ تلاوت‘‘ کے دوسرے مرحلے کے لیے منتخب ہونے والے شرکا کے ناموں کا اعلان کر دیا ہے۔ یہ اعلان سخت مقابلے اور قرآنی قاریوں کی بہترین کارکردگی کے بعد کیا گیا۔

مقابلے کا دوسرا مرحلہ ہفتہ ۲۹ اگست ۲۰۲۶ سے بدھ ۲ ستمبر ۲۰۲۶ تک مقامی وقت کے مطابق صبح ۹ بجے صوبہ جیزہ کے شہر ۶ اکتوبر میں واقع مصری وزارتِ اوقاف کی بین الاقوامی اکیڈمی کے مرکز میں منعقد ہوگا۔

دوسرے مرحلے کے لیے منتخب ہونے والے شرکا کو نئی پاسپورٹ سائز تصویر، قومی شناختی کارڈ کی ایک نقل ساتھ لانا ہوگی، جبکہ تصدیق کے لیے اصل شناختی کارڈ پیش کرنا بھی ضروری ہوگا۔ نابالغ شرکا کو پیدائش کے سرٹیفکیٹ کی نقل کے ساتھ اصل سرٹیفکیٹ بھی تصدیق کے لیے پیش کرنا ہوگا۔

مصر میں کچھ عرصہ قبل شروع ہونے والا دوسرا ٹیلی ویژن قرآنی مقابلہ ’’دولتِ تلاوت‘‘ مختلف مصری صوبوں سے باصلاحیت قرآنی قاریوں کی تلاش اور ان کی تربیت کا سلسلہ جاری رکھے ہوئے ہے۔

یہ پروگرام وزارتِ اوقاف اور المتحدہ میڈیا سروسز کمپنی کے تعاون سے تیار کیا گیا ہے، جس کا مقصد قرآنی قاریوں کی حمایت اور قواعدِ تجوید کے مطابق درست تلاوت کے فروغ کے لیے کام کرنا ہے۔

گزشتہ سال ’’دولتِ تلاوت‘‘ کا پہلا سیزن ملک کے مختلف صوبوں سے باصلاحیت قاریوں اور ممتاز تلاوت کرنے والوں کی شناخت کے مقصد سے منعقد کیا گیا تھا۔ اسے الحیاة، CBC، ناس، مصر قرآنِ کریم جیسے سیٹلائٹ چینلز اور ’’واچ اِٹ‘‘ پلیٹ فارم پر نشر کیا گیا تھا۔/

4371885