وحدت؛ شعار نہیں، بقا کی ضرورت اور لازمہ ہے
ایکنا: گھانا کے ایک مبلغ نے کہا: وحدت محض ایک نعرہ نہیں بلکہ آج کی پُرآشوب دنیا میں بقا کی ایک ضرورت ہے۔ ہم محققین اور مربّین کی حیثیت سے اس بات کے ذمہ دار ہیں کہ اسلام کے حقیقی پیغام کو درست اور مؤثر انداز میں تمام انسانوں تک پہنچانے کی اپنی علمی و عملی ذمہ داری ادا کریں۔
گھانا میں قومی مبلغین کی یونین کے نائب صدر شیخ موسیٰ بوارو نے تہران میں منعقدہ اسلامی وحدت کی چالیسویں بین الاقوامی کانفرنس کے موقع پر ایکنا سے گفتگو کرتے ہوئے قرآن کریم کی تعلیمات اور سنتِ نبویؐ کی روشنی میں امتِ مسلمہ کے عالمی چیلنجز کے مقابلے میں ایک متحد جسم کی صورت اختیار کرنے کی اہمیت پر زور دیا۔ انہوں نے اسلام کے حقیقی پیغام کی صحیح ترجمانی اور اسے دنیا تک پہنچانے میں دانشوروں کے کردار کو بھی اہم قرار دیا۔
ان سے ہونے والی گفتگو کی تفصیل درج ذیل ہے:
ایکنا: پائیدار امن و سلامتی کے حصول اور علاقائی و بین الاقوامی تبدیلیوں کا مقابلہ کرنے کے لیے امتِ مسلمہ کو تیار کرنے کا راستہ کیا ہے؟
ہماری نظر میں اس کا جواب قرآن کریم کی طرف رجوع اور واضح نبوی ہدایات کی پیروی میں پوشیدہ ہے۔ سب سے پہلے قرآن کریم کے حوالے سے اللہ تعالیٰ تمام مسلمانوں سے فرماتا ہے:
’’اور سب مل کر اللہ کی رسی کو مضبوطی سے تھام لو اور تفرقے میں نہ پڑو۔‘‘ (سورۂ آل عمران، آیت 103)
اس کا مطلب یہ ہے کہ تمام مسلمانوں کو متحد ہونا چاہیے اور سب مل کر اس واحد تعلق، یعنی اللہ کی رسی کو مضبوطی سے تھامنا چاہیے۔
یہ تعلیم ہمیں اسی بات کی طرف رہنمائی کرتی ہے جس کی طرف ہمارے نبی کریم حضرت محمد مصطفیٰؐ نے ہمیں دعوت دی، جب آپؐ نے فرمایا: تم میں سے کوئی شخص اس وقت تک حقیقی ایمان والا نہیں ہو سکتا جب تک وہ اپنے بھائی کے لیے وہی پسند نہ کرے جو اپنے لیے پسند کرتا ہے۔
ہم پوری دنیا کے مسلمانوں کو وحدت اور اتحاد برقرار رکھنے کی دعوت دیتے ہیں۔ اگر خدانخواستہ ایران، فلسطین یا گھانا بساؤ میں کسی مسلمان کو کوئی نقصان پہنچے تو دنیا کے گوشے گوشے میں موجود پوری مسلم برادری کو یوں محسوس ہونا چاہیے جیسے یہ مصیبت خود ان پر نازل ہوئی ہو۔/
4372713
