ایکنا نیوز- العتبہ علویہ نیوز کے مطابق میلے سے متعلق سرگرمیوں کے سلسلے میں عرب شعراء نے حرمِ امیرالمؤمنینؑ کے مختلف صحنوں کا دورہ کیا اور حرم کے احاطے میں موجود تاریخی عمارات اور منفرد طرزِ تعمیر کا مشاہدہ کیا۔

اس موقع پر شعراء نے روضہ حیدریہ کتب خانے اور اسلامی فنون کی نمائش کا بھی دورہ کیا۔ انہوں نے کتب خانے میں محفوظ علمی، تاریخی اور ادبی خزانوں کو سراہتے ہوئے کہا کہ یہ ذخیرہ اسلامی اور انسانی فکری ورثے کے تحفظ کی اہم مثال ہے۔

شرکاء نے اسلامی فنون کی نمائش میں موجود قیمتی پینٹنگز اور فن پاروں کو بھی دیکھا، جو اسلامی فن کی خوب صورتی اور اصالت کی عکاسی کرتے ہیں۔ انہوں نے حرمِ امام علیؑ کی تاریخی عمارات اور فنِ تعمیر کو بھی قابلِ تحسین قرار دیا۔

یہ سرگرمیاں پانچویں بین الاقوامی ہفتۂ صادقین کے پروگرام کا حصہ ہیں، جس میں قرآنی، ثقافتی، علمی، مکالماتی اور شعری پروگرام شامل ہیں۔ نبی اکرم حضرت محمد مصطفیٰ ﷺ کی ولادتِ باسعادت کی مناسبت سے حرمِ علوی کے اطراف اور شہر نجف کے مختلف علاقوں میں بھی متعدد سماجی و ثقافتی سرگرمیاں منعقد کی جا رہی ہیں۔

روضہ حیدریہ کتب خانہ

مکتبۃ الروضۃ الحیدریۃ نجف اشرف کے قدیم اور معروف کتب خانوں میں شمار ہوتا ہے اور حرمِ امیرالمؤمنینؑ کے صحن میں واقع ہے۔ یہ کتب خانہ ماضی میں نایاب کتابوں اور بزرگ اہلِ علم کے قلمی نسخوں کا اہم مرکز رہا ہے، تاہم مختلف ادوار میں اسے نقصان پہنچا اور اس کا قابلِ ذکر علمی ذخیرہ ضائع ہوگیا۔

صدام حکومت کے خاتمے کے بعد آیت اللہ سیستانی کی ہدایت پر کتب خانہ حیدریہ کو دوبارہ بحال کرکے کھولا گیا۔ آج یہ کتب خانہ متعدد شعبوں اور سہولیات سے آراستہ ہے اور اسلامی علمی و ثقافتی ورثے کے تحفظ میں اہم کردار ادا کر رہا ہے۔/

4373014