Tac-Mahal xarab olma təhlükəsi ilə üzləşib
İQNA-nın (Beynəlxalq Quran Xəbər Agentliyi) “The Times of India”-ya istinadən verdiyi xəbərə əsasən, UNESCO-nun Ümumdünya İrsinə daxil olan Hindistanda yerləşən Tac-Mahal həşəratların hücum təhlükəsi ilə üzləşib.
Hindistanın Arxeoloji İdarəsinin mütəxəssisi Vasant Svarankar məsələ ilə bağlı danışıb.
Onun sözlərinə görə, həşəratlar mavzoleyin ağ divarlarına oturaraq iri fərqli-fərqli rəngli ləkələrin yaranmasına səbəb olur. Nəticədə artıq tarixi abidənin bəzi yerlərindəki divar naxışlar xarab olub. Onların bərpası üçün isə müəyyən vaxt lazım olacaq.
Xatırladaq ki, Tac-Mahal Yamun çayının sahilində yerləşir və alimlər hələ 2016-cı ildə bəyan etmişdilər ki, adıçəkilən çayın təmizlik işlərinə ehtiyacı var. Bu istiqamətdə isə, hələ ki, heç bir tədbir görülməyib, məhz bu səbəbdən də həşəratlar bataqlığa çevrilmiş çayda sürətlə çoxala bilir.
