Ба гузориши икно ба нақл аз Ал-Ҷазира, 65 кӯдаки 4 то 9-солаи духтар ва писари сокини Ғазза, бо пӯшидани либосҳои суннатии фаластинӣ ва ширкат дар маъракаи «Ҳомилони нур» дар мактаб ва кӯдакистони «Ғирос»-и Ғазза, бахшҳое аз Қуръони Каримро дар ҳузури муаллимони худ аз ҳифз тиловат карданд.

Онҳо бо дар даст доштани плакатҳое, ки паёми ин маъракаро баёнгари ишқ ба Қуръони Карим ифода мекард, дар фазои омӯзишӣ ва имонӣ, тасвири зиндаеро аз кӯдаконе ба намоиш гузоштанд, ки дар даврони пур аз ҷанг ва фишор, талош мекунанд ба нури илоҳӣ тавассул ҷӯянд.

Дар ин маҳфил ва дар фазои саршор аз имон ва маънавият, чеҳраи кӯдакон пур аз шӯру шавқ буд. Мураббиён ва волидайн дар ҳоле, ки эҳсоси ифтихор мекарданд, ашки шавқ мерехтанд ва шоҳиди бардоштани аввалин гомҳои фарзандонашон дар масири ҳифзи Китоби Худо буданд.

Ин саҳна танҳо як ҷаласаи ҳифзу тиловати гузаро набуд, балки тасвири зиндае аз кӯдакие буд, ки дар тӯли ҷанг ва зери фишори дардҳову ранҷҳои ҳосил аз он, талош мекард ба нури имони худ пойбанд бимонад ва паёмеро мунташир кунад, ки тасдиқ мекард: Қуръон ҳанӯз ҳам қодир аст итминон ва умедро дар дили насли нав зинда нигоҳ дорад.

Барномаи маънавии «Маъракаи Нур» бар асоси фароҳам кардани як муҳити омӯзишии амн ва мубтанӣ бар имон барои кӯдакони Ғазза тарҳрезӣ шудааст. Ҳадаф аз он эҷоди пайванд миёни насли ҷадид ва Қуръони Карим тавассути ҳифз, тиловат ва фаҳми он аст, то шахсият ва рафтори улгуеро барои ҷомеаи мусулмони фаластинӣ тақдим кунад.

Масъулин таъкид мекунанд, ки қадрдонӣ аз кӯдаконе, ки Қуръонро ҳифз мекунанд, на танҳо ба мизони ҳифзи онҳо, балки ба сохтани инсоне марбут аст, ки нурро дар қалби худ ҳамл мекунад ва бо шафқат, огоҳӣ ва тааҳҳуди бештаре бузург мешавад; паёме, ки таъкид мекунад Қуръон ҳанӯз ҳам қодир ба эҷоди умед ва зиндагӣ ҳатто дар сахттарин шароит аст.

 

 

4353057