Нахустин сандуқи саросарӣ барои фароҳам овардани маблағҳои зарурӣ ба масҷидҳо ва муассисаҳои исломӣ дар Австралия таъсис ёфт.
Ба гузориши икно, ба нақл аз сомонаи muslimsaroundtheworld, ҷамоатҳои мусалмон дар кишварҳои ғайримусалмон бо мушкили муштарак рӯ ба рӯ ҳастанд: таъмини маблағҳои зарурӣ барои ҳифзи ҳувияти исломӣ, нигаҳдории муассисаҳои худ ва хидматрасонӣ ба наслҳои оянда.
Барои ҳалли ин ниёз, Шӯрои миллии имомони ҷамоати Австралия «Сандуқи Ҷомеаи Мусалмонон»-ро таъсис додааст. Ин сандуқ худро нахустин сандуқи саросарӣ барои таъмини маблағҳои зарурии мусалмонон дар Австралия муаррифӣ мекунад.
Ин иқдом бо ҳамкории Шӯрои миллии имомони ҷамоат амалӣ шудааст, ки намояндагии беш аз 370 имоми ҷамоат ва зиёда аз 260 созмони исломӣ ва иҷтимоиро аз саросари иёлотҳо ва минтақаҳои Австралия бар ӯҳда дорад.
Ҳадафи таъсиси ин сандуқ ҳалли мушкили камбуди маблағ барои тарҳҳои дарозмуддат дар дохили кишвар мебошад. Ин иқдом ба имомони ҷамоат ва муассисаҳои исломӣ имкон медиҳад, ки ба ҷойи маҳдуд шудан ба қонеъ кардани ниёзҳои фаврӣ, барои оянда барномаҳои пойдор ва дарозмуддат таҳия кунанд.
Масъулони Сандуқи Ҷомеаи Мусалмонон тавзеҳ доданд, ки мусалмонони Австралия ба таври суннатӣ барои масҷидҳо, маъракаҳои хайриявӣ ва кумак ба ниёзмандон дар кишварҳои дигар саховатмандона хайрия кардаанд. Бо вуҷуди ин, тарҳҳои дарозмуддате, ки ҳадафашон дастгирии ҷомеаи мусалмонон дар дохили Австралия мебошад, аксаран аз маблағгузории кофӣ бархӯрдор нестанд.
Ин вазъ боиси пайдо шудани андешаи таъсиси сандуқе барои ҷамъоварии хайрияҳо ва равона кардани онҳо ба самти ниёзҳои муҳим ва бунёдӣ шудааст. Чунин иқдом ба муассисаҳои исломӣ имкон медиҳад, ки фаъолият ва тарҳҳои худро ба таври низомманд ба нақша гиранд.
Самтҳое, ки ин сандуқ ният дорад аз онҳо пуштибонӣ кунад, иборатанд аз барномаҳои ҳифзи ҳувияти исломӣ, роҳнамоӣ ва машварат, огоҳсозии расонаӣ, пуштибонии ҳуқуқӣ, иштироки сиёсӣ ва ҳамкории иҷтимоӣ.
Ин самтҳо ба тақвияти тавоноии мусалмонон барои ҳимояи манфиатҳои худ ва ҳамкорӣ бо ниҳодҳои давлатӣ, инчунин дастгирии иқдомҳое равона шудаанд, ки ба пойдории муассисаҳои исломӣ ва хидматрасонии онҳо ба ҷомеа мусоидат мекунанд.
«Иттиҳоди мусалмонони Австралия» як ниҳоди мустақили саросарӣ ва аз нигоҳи сиёсӣ бетараф мебошад, ки муассисаҳои исломӣ ва иҷтимоиро аз саросари кишвар гирди ҳам меорад. Ин иттиҳод барои густариши ҳамкорӣ миёни онҳо ва барқарор кардани робита бо ниҳодҳои давлатӣ ва ғайридавлатӣ талош мекунад.
Самтҳои фаъолияти ин иттиҳод ҳимояи ҳуқуқи мусалмонон, ҳифзи ҳувияти исломӣ, намояндагӣ дар расонаҳо, равобити умумӣ, пуштибонии сиёсӣ ва баррасии масъалаҳои марбут ба занони мусалмонро дар бар мегирад.
Шӯрои миллии имомони Австралия (NCAI), ки яке аз асосгузорони ин иттиҳод мебошад, дар ин тарҳ низ ширкат дорад. Ин шӯро ҳамчун ниҳоде шинохта мешавад, ки намояндагии пешвоёни динии мусалмононро дар Австралия бар ӯҳда дорад.
4387419