د پاکستان لومړي وزیر اسامه بن لادن شهید بللی
خواجه اصف د پاکستان د پارلمان په غونډې کښې وویل لومړي وزیر عمران خان د القاعده ډلې مشر اسامه بن لادن شهید بللی دی .
هغه وویل د القاعده ډلې مشر اسامه بن لادن پاکستان ته ترهګرۍ راوړي ده او هغه یو (۱)ټروریسټ و خو لومړی وزیر عمران خان هغه ته شهید وايي .
د پاکستان لومړي وزیر عمران خان پرون د پارلمان غونډې ته په وینا کښې له امریکا سره د خپل هیواد اړیکو ته په اشارې سره وویل اسلام اباد د ترهګرۍ پرضد جنګ کښې له امریکا سره له مرستې کولو سره سره له ډیرې رسواۍ سره مخ دی او پاکستان په افغانستان کښې د امریکا د ناکامیو مسول بلل کیږي .
د پاکستان د پیپلز ګوند مشر بلاول بوټو زرداري هم وویل چې د عمران خان په حکومت کښې په پیښور کښې د پوځ په ښوونځي د حملې مسول کسان وتښتیدل .
د پاکستان د پیپلز ګوند د مشر ویاند سناتور مصطفی نواز کهوکر هم په یوې (۱)بیانیې کښې لومړی وزیر عمران خان د ملي امنیت لپاره ګواښ وباله .
هغه وویل عمران خان د القاعده ډلې د مشر په شهید بللو سره د ملي امنیت لپاره ګواښ جوړ شوی دی .
کهوکر وویل که چیرې اسامه بن لادن شهید دی نو بیا هغو ملکیانو او حکومتي عسکرو ته چې د القاعده ډلې په حملو کښې شهیدان شوي دي کوم نوم ورکړو .
هغه وویل په پاکستان کښې د القاعده ډلې په حملو کښې په زرګونو ملکیان او ځوانان شهیدان شوي دي .
د پاکستان د پیپلز ګوند د مشر ویاند سناتور مصطفی کهوکر وویل نن لومړي وزیر عمران خان ثابته کړه چې هغه په پارلمان کښې طالبان خان دی .
هغه وویل عمران خان هغه سړی دی چې له طالبانو څخه یې په پاکستان کښې د خپل دفتر د خلاصولو غوښتنه کړي وه .
د پاکستان د پیپلز ګوند سیناتورې میرمن شیري رحمان هم وویل پاکستان اوس هم د اسامه بن لادن د ترهګرو حملو قرباني دی .
هغې وویل پاکستان د اسامه بن لادن په وجه له ترهګرۍ سره مخ دی او عمران خان بیا هم هغه په پارلمان کښې د هیرو او اتل په شان مطرح کوي .i91049
