Баргузории иҷлоси байналмилалии Фаластин дар Швейтсария
Ба гузориши ИКНА, ба нақл аз Minanews, ин ҳамоиш бо назорати давлати Швейтсария баргузор мегардад ва интизор меравад паёмадҳои сиёсӣ ва байналмилалии зиёде дошта бошад. Дар ин ҳамоиш дархостҳое барои зарурати мамнӯъияти мусаллаҳсозии режими саҳюнистӣ матраҳ хоҳад шуд.
Маҷмаи умумии Созмони Милали Муттаҳид ба давлати Швейтсария ин иҷозаро додааст, ки ин ҳамоишро бо тамаркуз бар ҳимояти ғайринизомиён ва мавзӯи ишғолгарии Исроил дар заминҳои Фаластин ва масъулияти кишварҳои мухталиф дар ин бора баргузор кунад.
Швейтсария ҳамчун кишвари нозир бар Созишномаҳои Женева нақши муҳим дар ҳифзи санадҳои марбут ба ин аҳдномаи аслӣ дошта, дар баробари ҳимоят аз кишварҳои имзокунандаи ин созишномаҳо, дар даргириҳо бетараф амал мекунад.
То кунун се ҳамоиш дар бораи Фаластин дар солҳои 1999, 2001 ва 2014 дар Швейтсария баргузор шудааст. Ҳамоиши соли 2014 пас аз ҷанги 50-рӯзаи Исроил дар Навори Ғазза баргузор гардид. Дар ду ҳамоиши аввали кишварҳои узви Созишномаи Женева иҷрои аҳдномаи чоруми Женева дар сарзаминҳои ишғолӣ, аз ҷумла Қудси Шарқиро талаб карда буданд.
Созишномаи чоруми Женева аз ғайринизомиёни таҳти ҳокимияти нерӯҳои ишғолгар дар сарзамини худ ё заминҳои ишғолгарӣ ҳимоят мекунад. Моддаи 49-и ин созишнома ба кишварҳои ишғолгар иҷозат намедиҳад, ки сокинони ғайринизомиро маҷбур ба муҳоҷират ё кӯчонидан ба сарзаминҳои таҳти ишғол кунанд ё афроди таҳти ҳимояро аз заминҳои таҳти ишғол берун кунанд.
Иҷлоси Швейтсария наметавонад тасмимоти ҳатмӣ қабул кунад, аммо метавонад қонунҳои байналмилалии башардӯстона дар бораи Фаластин ва масъулиятҳои кишварҳои узви созишномаи кунунии Женеваро таҳким бахшад.
https://iqna.ir/fa/news/4255888
