Қатли ом дар Ғаззаро ҳадди ақал дар рӯзи милоди Исо (а) қатъ кунед
Ба гузориши "Ал-Қудсул-Арабӣ," Саид Ал-Шаҳобӣ, нависандаи баҳрайнӣ, дар ёддоште ба муносибати милоди ҳазрати Исо (а) ва идомаи таҷовузоти режими ҷинояткор ва кӯдаккуши саҳюнистӣ дар Ғазза ба ин мавзӯъ пардохтааст.
Истилоҳи "қатли ом" ва фоҷеаи Ғазза
Дар бораи истифодаи истилоҳи "қатли ом" барои амалиёти Исроил алайҳи Ғазза баҳсҳои зиёде вуҷуд дорад. Ҳамзамон бо фаро расидани фасли зимистон, зиндагӣ дар чодарҳо барои оворагоне, ки хонаҳояшон дар бомбборони режими палид ва ҷинояткори саҳюнистӣ хароб шудаанд, душворӣ ва ранҷи зиёдеро ба бор овардааст. Камии таҷҳизоти пизишкӣ ва дармонӣ мушкилоти оворагони фаластиниро дучандон кардааст, то ҷое, ки бархе аз идомаи зиндагӣ қатъи умед кандаанд.
Ин манзараҳо ҳаррӯза дар экранҳои телевизион пайдо мешаванд, аммо такрори онҳо онҳоро ба манзараҳои оддӣ табдил додааст, ки дигар эҳсосотро барнамеангезад. Ин амр сабаб шудааст, ки бомбборонҳои бепоён идома ёбанд ва нерӯҳои ишғолгар ва кӯдаккуши саҳюнист далеле барои қатъи ин амалҳо барои худ намебинанд.
Беэҳсосии ҷаҳон ва қатли ом
Бо вуҷуди талошҳои созмонҳои кумакрасонии башардӯстона, ки кормандони онҳо ҷони худро дар роҳи кӯмак ба фаластиниён аз даст медиҳанд, ҷаҳон ба як мавҷуди бидуни ахлоқ ва инсонгарӣ табдил ёфтааст. Аз ибтидои соли ҷорӣ, беш аз 160 корманди кумакрасон, ки дар Фаластин машғули фаъолияти хайрхоҳона буданд, кушта шудаанд. Ин нишон медиҳад, ки нерӯҳои ишғолгар онҳоро пайваста мавриди ҳадаф қарор медиҳанд.
То кунун беш аз 45 ҳазор нафар аз мардуми Ғазза дар бомбборонҳои ҳаррӯзаи ҳавопаймоҳои режими ҷинояткор ва кӯдаккуши саҳюнистӣ шаҳид шудаанд ва зиёда аз се баробари ин шумора захмӣ шудаанд, ки бисёре аз онҳо аз зиндагии оддӣ маҳрум шудаанд. Бо вуҷуди дархостҳои байналмилалӣ барои қатъи ҷанг, режими ҷинояткори саҳюнистӣ ҳамчунон аз қатъи ҷанг саркашӣ мекунад ва бар идомаи бомбборон исрор меварзад.
Мушкилоти байналмилалӣ ва вокунишҳои номуносиб
Бархе бар ин боваранд, ки рӯйдодҳои Ғазза бо таърифи ҳуқуқии қатли ом мувофиқат мекунанд. Чанд омили аслӣ барои ин ишора шудааст:
1. Бомбборонҳо ба як амали оддӣ табдил шудаанд, ки дилҳоро санг карда ва эҳсосоти бисёре аз мардум хушкидаанд.
2. Расонаҳои ғарбӣ, ки бояд виҷдони масъулони кишварҳои ҷаҳонро барангезанд, аз тасвири воқеӣ ва дақиқи он чӣ дар Ғазза мегузарад, худдорӣ мекунанд.
3. Бетафовутии кишварҳои дигар нисбат ба ранҷу азоби мардуми Фаластин танқидҳои зиёдеро ба самти Иттиҳодияи Араб, Созмони Ҳамкории Исломӣ ва Созмони Милал кашидааст. Ҳатто бархе кишварҳои арабӣ муносибатҳои худро бо режими саҳюнистӣ оддӣ кардаанд.
4. Мақомҳои режими палид ва кӯдаккуши саҳюнистӣ бар онанд, ки тавоноии низомии онҳо ба ҳадде баланд аст, ки метавонанд таҷовуз ба Ғаззаро барои расидан ба аҳдофи худ идома диҳанд.
Бо вуҷуди тамоми ин қудратнамоӣ, ҳадафҳои Нетаняҳу, ки шикасти гурӯҳҳои муқовимати Фаластин ва Лубнон буд, то кунун амалӣ нашудааст. Бо вуҷуди чеҳраи дунявии ҳукумати ишғолгар, онҳо ин амалҳоро як вазифаи динӣ аз китобҳои муқаддас дониста, талош доранд Фаластинро аз харитаи ҷаҳон ва хотираи башарият пок кунанд.
Нидое барои виҷдони башарият
Созмони Афви Байналмилал дар гузорише, ки 5 декабр нашр кард, эълом дошт, ки режим Исроил ва артиши ин режим беш аз се аз панҷ амали мамнӯъ тибқи Конвенсияи ҷилавгирӣ аз қатли ом (соли 1948)-ро анҷом додаанд, яъне куштор, эҷоди осебҳои ҷиддии ҷисмонӣ ё равонӣ ва таҳмили шароити зиндагӣ бо ҳадафи нобудии гурӯҳи муҳофизатшуда.
Бо умеди он ки виҷдони башарият аз хоби ғафлат бедор шавад, дар рӯзи милоди ҳазрати Исо (а), роҳбарони ғарбӣ роҳу расми муҳаббати беғаразонаи ҳазрати Исоро пайравӣ кунанд ва ҷаҳони дур аз ҷанг, хуношомӣ ва зиндагии амнтару устувортаре дошта бошем. То мардуми Фаластин - навобаста ба мусалмон, масеҳӣ ё яҳудӣ буданашон - битавонанд дар оромишу амният зиндагӣ кунанд ва субот пас аз даҳсолаҳо таниш, ҷанг, хуношомӣ ва ишғолгарӣ ба ин сарзамин бозгардад.
