Дарду ранҷи занони Руҳингия ҳангоми фирор аз урдугоҳҳо
Ба гузориши ИКНА, ба нақл аз Хабаргузории Аракан, ранҷи занон ва духтарони Руҳингия танҳо ба озорҳое, ки дар сарзамини модарии худ дар иёлати Роҳин (дар ғарби Мянмар) мебинанд, маҳдуд намешавад. Онҳо дар саъй барои фирор аз хушунатҳои иёлати Роҳин ё берун шудан аз урдугоҳҳои шадиди паноҳандагон дар Бангладеш бо бондҳои қочоқи инсон рӯбарӯ мешаванд.
Дар гузорише, ки шабакаи байналмилалии хабарии Бирма нашр кардааст, омадааст, ки аксари 61 зане, ки бо онҳо мусоҳиба шудааст, аз ҷониби қочоқчиён бо хушунатҳои ҷинсӣ, латукӯб ва ҳатто тирпаронӣ дучор шудаанд.
12 зан ва духтар изҳор доштаанд, ки ҳангоми сафари худ дар ҷангалҳо ё қоиқҳо аз ҷониби қочоқчиёни инсон, ки ба онҳо дар фирор кӯмак мекарданд, мавриди хушунати ҷинсӣ қарор гирифтаанд.
Шабака зикр кардааст, ки бештари ин занон ҷавононе буданд, ки бо ҳадафи издивоҷ бо мардони Руҳингия, ки дар кишварҳои дигар кор мекарданд, сафар менамуданд. Аксари онҳо тавассути роҳҳои қочоқи заминӣ ба Малайзия мерафтанд.
Гузориш инчунин таъкид мекунад, ки хатари боздошти занон аз ҷониби мақомоти Мянмар, новобаста ба пораҳое, ки қочоқчиён мепардозанд, хеле баланд аст. Аз миёни 46 зане, ки қасди сафар ба Малайзия доштанд, танҳо 13 нафари онҳо ба макони худ расидаанд.
Дар хонаводаҳои Руҳингия, фиристодани духтарон таҳти фишори фақр ва бо орзуи зиндагии беҳтар дар Малайзия маъмул шудааст.
Арзиши як сафари қочоқӣ ба Малайзия аз 9 то 11 миллион кият (тақрибан 4 то 5 ҳазор доллари амрикоӣ) буда, ба миёнаравон пардохт мешавад.
Ин гузориш таъкид мекунад, ки заноне, ки ба Ҳиндустон мераванд, низ аз ин мушкилот эмин намемонанд. Ҳашт зан изҳор доштаанд, ки аз ҷониби қочоқчиён ва ҳатто афсарони полиси Ҳиндустон мавриди бадрафторӣ қарор гирифтаанд.
Нисфи занони мазкур аз иёлати Роҳин дар ғарби Мянмар ва нисфи дигар аз урдугоҳҳои серодами паноҳандагон дар Бангладеш фирор кардаанд, ки беш аз як миллион паноҳандаи Руҳингия дар шароити сахт умед ба зиндагии беҳтар доранд.
