Тарғиби усул ва равишҳои ҳифзи Қуръон ба сабки эронӣ дар Индонезия
Ба гузориши ИКНА, ба нақл аз намояндагии фарҳангии Ҷумҳурии Исломии Эрон дар Индонезия, Муҳаммадризо Иброҳимӣ, намояндаи фарҳангии Ҷумҳурии Исломии Эрон дар Индонезия, дар маросими ифтитоҳи ин давраи омӯзишӣ гуфт: «Барномаи ҳифзи Қуръони Карим ба равиш ва сабки эронӣ бо ҳадафи густариши фарҳанг ва амал ба таълимоти қуръонӣ ва афзоиши шумори ҳофизони каломи ваҳй муҳимтарин стратегияи ин барнома мебошад. Таваҷҷуҳ ба шеваи таълим дар сираи Пешвои Инқилоб ва ёдоварии он кас аз аҳамияти ҳифзи Қуръони Карим ва камбуди ҷиддии ҳофизони Қуръон дар ҷомеаи исломӣ ва ҳатто кишварҳои исломӣ аҳамияти ин стратегияро дучандон кардааст».
Марзия Абӯлҳасанӣ, мударрис ва ҳофизи Қуръони Карим, дар ҷамъомади мураббиён ва устодони ҳифзи Қуръон гуфт: «Вақте ҷойгоҳ ва қадру манзалати ҳифзи Қуръони Карим барои афрод рӯшан бошад, албатта, азми инсонҳо барои ҳифзи Қуръон устувортар мешавад. Пас, аввалин чизе, ки бояд барои омӯзандагони Қуръон табйин шавад, ангезаи ҳофиз шудан аст».
Вай изҳор дошт: «Дар кишварҳои мухталиф, равишҳои ҳифзи Қуръони Карим каме фарқ мекунад. Бархе кишварҳо тавассути китобат ҳифз мекунанд, яъне аз ҳисси ламс кӯмак мегиранд. Бархе кишварҳо ба шеваи самоӣ, яъне бо истифода аз ҳисси шунавоӣ, амал мекунанд. Ба тозагӣ равише бо номи равиши тасвирӣ ихтироъ шудааст, ки бештар аз ҳисси биноӣ истифода мешавад. Албатта, вақте аз тамоми ҳасс барои ҳифзи Қуръон истифода кунем, албатта, натиҷаи беҳтар хоҳем гирифт. Ин равише аст, ки дар Эрон роиҷ мебошад ва ҳазорон нафар тавассути он муваффақ ба ҳифзи Қуръон шудаанд.
Китоби «Равиш ва сабки ҳифзи Қуръони Карим» бо истифода аз таҷрибаҳои устодони эронӣ ба забони индонезӣ ба зудӣ тарҷума ва дар ихтиёри мударрисон ва муассисаҳои ҳифзи Қуръон қарор хоҳад гирифт».
https://iqna.ir/fa/news/4256698
