Ҳузури фаъоли намояндагии фарҳангии Эрон дар Намоишгоҳи байналмилалии Ҳалол дар Бангкок + Акс
Ба гузориши ИҚНО аз Тайланд, маросими расмии ифтитоҳи намоишгоҳ субҳи рӯзи чоршанбе, 16-уми июли 2025 (25-уми тирмоҳ), дар маркази намоишгоҳии BITEC Bangna бо ширкати мақомдорони баландпоя аз кишварҳои гуногун, аз ҷумла сафирони кишварҳои исломӣ, масъулони Шӯрои марказии исломии Тайланд ва намояндагони сохторҳои давлатӣ ва иқтисодии Тайланд баргузор шуд.
Дар ин ифтитоҳ, раъзан (намояндаи фарҳангӣ)-и Эрон дар Тайланд дар канори дигар мақомот ширкат карда, бо меҳмонони байналмилалӣ, сафирон ва масъулони намоишгоҳ перомуни зарфиятҳои фарҳангӣ, истеҳсолӣ ва содиротии Эрон дар соҳаи "ҳаёти ҳалол" гуфтугӯ анҷом дод.
Вай таъкид кард, ки фарҳанг, иқтисод ва арзишҳои маънавӣ бо ҳам пайванди ҷудонашаванда доранд ва чунин намоишгоҳҳо на танҳо ҷой барои муаррифии маҳсулот, балки як саҳнаи муҳими муколамаи байнифарҳангӣ ва тақвияти робитаҳои башарӣ мебошанд.
Ғуфраи Ҷумҳурии Исломии Эрон бо рақами AA-29, яке аз ғуфраҳои калон ва муҳим буда, маҷмӯае аз маҳсулоти гуногуни эронӣ – аз хӯроквории ҳалол, шириниҳо ва маҳсулоти суннатӣ то либосҳои анъанавӣ ва артикулҳои фарҳангӣ – ба намоиш гузошта шудааст.
Баъдан, раиси намояндагии фарҳангии Эрон бо сафирони кишварҳои исломӣ дар Тайланд, аз ҷумла Малайзия, Индонезия, Покистон, Туркия, Бангладеш ва Қатар дидору гуфтугӯ карда, оид ба густариши ҳамкориҳои фарҳангӣ ва иқтисодӣ дар бозори ҳалол, мубодилаи таҷриба ва ҳамкориҳои оянда баррасӣ намуд.
Намоишгоҳи MEGA HALAL Bangkok 2025, нахустин рӯйдоди бузурги мустақил дар Тайланд аст, ки комилан ба "ҳаёти ҳалол" бахшида шудааст. Ин намоишгоҳ аз 16 то 18 июл (25 то 27 тирмоҳ) баргузор мешавад ва интизор меравад, ки даҳҳо ҳазор меҳмон аз дохил ва хориҷ кишвар аз он боздид кунанд.
Бино ба гуфтаи ташкилкунандагон, беш аз 400 то 500 ширкат аз 50 кишвари ҷаҳон дар ин намоишгоҳ иштирок доранд. Ин ширкатҳо, намояндагони соҳаҳои гуногуни марбут ба маҳсулот ва хизматрасониҳои ҳалол мебошанд – аз кишварҳои осиёӣ, аврупоӣ, африқоӣ ва ҳам минтақаи Ховари Миёна.
Арон Бунчом, Шайхул-Ислом Тайланд, зимни суханрониаш дар ифтитоҳ гуфт: «Ҳалол танҳо як иҷозаи истеъмоли хӯрок нест – ин як ҷаҳонбинӣ ва тарзи ҳаёти илоҳист. Ин маъно дорад, ки мусалмон дар ҳар ҷое бошад, бояд покиву адолатро дар ҳама ҷабҳаҳо – аз хӯроку либос то муомила ва тарбияи фарзанд – риоя кунад.»
Ӯ афзуд: «Ҳалол нишонаи эҳтиром ба арзишҳои илоҳӣ аст ва як мусалмон ҳатто набояд чизе ғайрихалолро ба як дӯсташ, агарчи ғайримусалмон бошад, пешниҳод кунад.»
Шайхул-Ислом гуфт: «Яке аз ҳадафҳои аслии баргузории ин намоишгоҳ, муаррифии зарфиятҳои бузурги истеҳсоли маҳсулоти ҳалол дар Тайланд аст. Бо ҷамъияти калони мусалмон ва истеҳсолкунандагони комёб, Тайланд метавонад ба яке аз 5 кишвари бузурги содиркунандаи маҳсулоти ҳалол табдил ёбад.»
Дар канори ифтитоҳ, ташкилкунандагон аз ширкати фаъоли Ҷумҳурии Исломии Эрон изҳори сипос карда, умедворӣ намуданд, ки ҳузури Эрон дар ин намоишгоҳ метавонад мавқеи кишварро ҳамчун як бозигари муҳим дар соҳаи фарҳанг ва иқтисоди ҳалол дар сатҳи ҷаҳонӣ таҳким бахшад.
4294896
