Хашми созмонҳои ҳуқуқи башар аз таҳқир ба Қуръон дар Амрико
Ба гузориши ИҚНО бо истинод ба elmanshar.com, ин тазоҳуроти зиддиисломӣ дар шаҳри Плейно, воқеъ дар ноҳияи Коллини Техас, рух дод. Дар ҷараёни он, Ҷейк Лонг бо гузоштани нусхае аз Қуръони Карим ба даҳони як хук, амали таҳрикомез анҷом дод, ки хашми мусалмонон, фаъолони ҳуқуқи башар ва нозирони байналмилалиро барангехта, боиси шоки густарда дар сатҳи дохилӣ ва байналмилалӣ гардид.
Лонг дар наворе, ки дар шабакаҳои иҷтимоӣ ва расонаҳо паҳн шудааст, дар ҳоле ки як хуки хурдро бо нусхае аз Қуръон дар даҳонаш дар даст дорад, зоҳир шуда, ин ҳайвонро «нуқтаи заъфи ислом» тавсиф мекунад ва мегӯяд:
«Ин нуқтаи заъфи шумост, мусалмонон. Мо шуморо ба ҷое, ки аз он ҷо омадаед, бозмегардонем, дар ҳоле ки хукҳоро дар дастҳоямон ва Масеҳро дар дилҳоямон дорем».
Лонг ин эътирозро дар Плейно пас аз як силсила тазоҳуроти монанд созмон дод, ки охирини онҳо дар шаҳри Дирборни иёлати Мичиган баргузор шуда буд. Ӯ ин амалҳоро бахше аз фаъолиятҳои худ алайҳи он чи «исломишавии Амрико» меномад, тавсиф кардааст.
Фаъолон гузориш доданд, ки ин тазоҳурот бо шиорҳои таҳрикомези зиддиисломӣ ба самти бинои шаҳрдории Плейно ҳаракат мекард.
Ин иқдом хашми ҷомеаи маҳаллӣ ва созмонҳои ҳуқуқи башарро барангехт. Ин созмонҳо онро ҳамчун талоше барои барангехтани нафрати динӣ маҳкум карда, таъкид намуданд, ки чунин амалҳо ба ҳеҷ гуна баҳси фарҳангӣ дар бораи дин ё ҷомеа кумак намекунад.
Ин ҳодиса ҳамчунин дар платформаҳои шабакаҳои иҷтимоӣ баҳси густардаеро ба бор овард. Корбарон бо бознашри навор, ин амалро як таҳрики ошкоро ва таҳқир ба эҳсосоти миллионҳо мусалмон дар Иёлоти Муттаҳида ва саросари ҷаҳон арзёбӣ карданд.
Ин рӯйдод ҳамзамон бо афзоиши мавҷи эътирозҳои зиддиисломӣ дар баъзе иёлатҳои Амрико ба вуқуъ пайваста ва коршиносони ҷомеаи шаҳрвандиро водор кардааст, то хостори тақвияти талошҳо барои боло бурдани огоҳӣ алайҳи нафратпарокании динӣ ва таҳкими қонунҳо зидди таҳрик ба хушунат ва нафрат шаванд.
4322752
