Истиқболи боздидкунандагон аз масҷиди «Фахрулмуслимин» дар Русия
Ба гузориши ИҚНО бо истинод ба Онатолӣ, масҷиди «Фахрулмуслимин» (Ифтихори мусулмонон), ки ба номи ҳазрати Муҳаммад (с) гузошта шудааст, яке аз барҷастатарин намунаҳои меъмории исломӣ дар Русия ба шумор меравад ва таваҷҷуҳи боздидкунандагони дохиливу хориҷиро ба худ ҷалб мекунад.
Ин масҷид, ки дар шаҳри Шалӣ — пойтахти Чеченистон, яке аз ҷумҳуриҳои Федератсияи Русия воқеъ аст, тарҳи муосири меъмориро бо зебошиносии суннатии исломӣ дар ҳам меомезад.
Масҷид бо гумбазҳои бошукӯҳ, манораҳои мураккаб ва фазои дохилии васеи худ фарқ мекунад.
Тарҳи куллии ин масҷид, ки аз ҷониби як меъмори ӯзбек таҳия шудааст, бозгӯкунандаи вижагиҳои меъмории исломии Осиёи Марказӣ мебошад: гумбазҳои барҷаста, нақшаҳои мутаносиб ва услуби ороишии хоси меъмории классикии исломӣ дар шаҳрҳои Осиёи Марказӣ, ба вижа Самарқанд ва Бухоро.
Ин масҷид бо зарфияти 30 ҳазор намозгузор яке аз бузургтарин масҷидҳои Русия ба ҳисоб меравад ва ба таври махсус дар намози ҷумъа ва идҳои мазҳабӣ маъруф аст.
Фазои дохилии васеъ, сақфҳои баланд ва нури табиии фаровон ба намозгузорон имкон медиҳанд, ки ибодати худро дар оромиши комил анҷом диҳанд.
Хаттотии арабӣ ва нақшҳои геометрии классикии исломӣ, ки дар ороиши дохилии масҷид истифода шудаанд, зебошиносии ҳамоҳангро ба вуҷуд меоранд.
Толори асосии намоз, ки бузург ва бидуни сутун аст, ба паҳншавии аълои садо мусоидат карда, баргузории намозҳои ҷамоатиро осон мекунад.
Ҳавлӣ ва фазоҳои сабзи васеи масҷид муҳити муносиберо барои баргузории чорабиниҳои бузург ва пазироии шумораи зиёди намозгузорон дар рӯзҳои идҳои мазҳабӣ фароҳам меоранд.
4324272
