Маҷбур сохтани занони зиндонии фаластинӣ ба бардоштани ҳиҷоб
Ба гузориши ИҚНО ба нақл аз «Анатолӣ», дафтари расонаии асирони фаластинӣ хабар дод, ки зиндониёни зан дар зиндони Домун (Дамон) дар сарзаминҳои ишғолшуда дучори қонуншиканиҳои ваҳшиёна, аз ҷумла «бардоштани ҳиҷоб ва латукӯб» мешаванд. Ин амалҳо бахше аз як силсила ҳамлаҳост, ки дар моҳи декабр чаҳор маротиба рух дода ва боиси захмӣ шудани чанд нафар аз онҳо низ гардидааст.
Ин хабар дар баёнияе зикр шудааст, ки рӯзи душанбе аз сӯи ин дафтар, вобаста ба ҳаракати Ҳамос, мунташир гардид. Дар баёния омадааст, ки ин раванд нишонаи ташдиди хатарнок ва идомадори бадрафторӣ алайҳи зиндониёни зани фаластинӣ дар зиндони Димон буда, «нақзи ошкори ҳамаи қонунҳо ва меъёрҳои башардӯстона» маҳсуб мешавад.
Дар бахши дигари ин баёния гуфта мешавад, ки зиндониёни занро ба ҳавлӣ бурда, бо зӯр маҷбур карданд рӯи замин биншинанд. Ҳиҷобашон бардошта шуд ва илова бар истифода аз сагҳо ва норинҷакҳои беҳискунанда, мавриди латукӯб қарор гирифтанд.
Дар баёния ҳамчунин тавзеҳ дода шудааст, ки бар асари ҳамлаҳои ваҳшиёна, ки дар моҳи декабр чаҳор бор пайдарпай анҷом шуд, теъдоде аз зиндониёни зан захмӣ шудаанд.
Дафтари расонаии асирони фаластинӣ режими саҳюнистиро комилан масъули амнияти зиндониёни зан дониста, нисбат ба хатари «идомаи ин равиши саркӯбгарона» ҳушдор дод.
Ин марказ аз созмонҳои ҳуқуқи башар ва башардӯстона даъват кард, ки барои боздошти нақзҳои рӯзафзун алайҳи зиндониёни зан дар зиндони Домун чораҳои фаврӣ андешанд.
Тибқи гузоришҳои созмонҳои ҳуқуқи башари фаластинӣ ва исроилӣ, режими саҳюнистӣ беш аз 9300 зиндонии фаластинӣ, аз ҷумла кӯдакон ва занонро дар боздошт нигоҳ медорад, ки аз шиканҷа, гуруснагӣ ва бетаваҷҷуҳии тиббӣ ранҷ мебаранд ва ин ҳолат боиси марги бисёре аз онҳо шудааст.
Ҷиноятҳои режими саҳюнистӣ алайҳи асирон ҳамзамон бо ҷанги дусолаи наслкушӣ, ки аз октябри соли 2013 дар Навори Ғазза оғоз кардааст, афзоиш ёфтааст. Дар ин ҷанг тақрибан 71 ҳазор фаластинӣ кушта ва беш аз 171 ҳазор нафар захмӣ шудаанд, ки бештари онҳо кӯдакон ва занон мебошанд.
4324486
