Боздиди мубаллиғони хориҷӣ аз осори таърихии динии Миср
Бино ба иттилои икно бо истинод ба «Садо ал-Балад», ин барнома барои иштирокчиёни хориҷии давраи мазкур, ки аз кишварҳои Алҷазоир, Нигерия, Ҳиндустон, Гана, Того, Бангладеш ва Мадагаскар мебошанд, ташкил гардид. Давраи омӯзишӣ ду моҳ идома меёбад.
Ҳасан Ас-Сағир, раиси Академияи ҷаҳонии Ал-Азҳар, изҳор дошт, ки ин сафар бахше аз як барномаи фарогир мебошад, ки бо ҳадафи шиносоии иштирокчиён бо маконҳои динӣ ва фарҳангии Миср роҳандозӣ шудааст.
Вай бо ишора ба боздиди ҳафтаи гузашта аз Масҷиди Ҷомеъи Ал-Азҳар гуфт, ки иштирокчиён дар он ҷо бо таърихи пурғановат, саҳнҳо ва нақши муҳими ин масҷид дар густариши улуми исломӣ, забони арабӣ ва таҳкими фарҳанги эътидол ва миёнаравӣ ошно шуданд.
Ас-Сағир афзуд, ки гуногунрангии ин боздидҳо нишондиҳандаи равиши Ал-Азҳар дар тарбияи мубаллиғоне мебошад, ки ҳам аз донишҳои динӣ ва ҳам аз фарҳанг огоҳ бошанд. Ба гуфтаи ӯ, чунин сафарҳо барои шиносоӣ бо мероси ғании фарҳангӣ, таърихӣ ва инсонии Миср мусоидат намуда, қобилияти иштирокчиёнро барои муаррифии дурусти рисолати Ал-Азҳар дар саросари ҷаҳон тақвият мебахшанд.
Барномаи мазкур боздид аз чандин ёдгории муҳими таърихӣ ва динӣ дар минтақаи Фустотро дар бар гирифт.
Дар доираи ин сафар, иштирокчиён аз чандин бинои машҳури масеҳӣ, аз ҷумла Калисои Муаллақа (Калисои овезон) ва Калисои Абу Серҷа боздид намуда, бо аҳаммияти таърихии ин маконҳо ошно шуданд.
Мубаллиғони хориҷӣ инчунин аз Қалъаи Бобилиюн дидан карданд. Ин қалъа яке аз қадимтарин ёдгориҳои бостоншиносии Миср ба шумор рафта, тасвире аз давраи ҳукмронии Рум то замони фатҳи исломии Мисрро пешкаши боздидкунандагон мекунад.
4355536
