Маҳдудиятҳо барои баргузории маросими муҳаррам барои шиъаёни Арабистони Саудӣ
Бино ба гузориши икно ба нақл аз «Наба», бо вуҷуди маҳдудиятҳои амниятӣ ва мазҳабии аз ҷониби давлати Арабистони Саудӣ ҷорӣшуда, сокинони минтақаи Қатиф дар шаби аввали моҳи муҳаррам бо баргузории дастикам 600 маҷлиси ҳусайнӣ бар идомаи ойинҳои ошуроӣ таъкид карданд. Ин маросимҳо рамзи пойбандии ҷомеаи шиъаи ин минтақа ба шиорҳои динӣ ва ҳувияти мазҳабии онҳо ба ҳисоб мераванд.
Тибқи мушоҳидаҳои саҳроӣ ва омори нашркардаи платформаи «Масурат», ин маҷлисҳо дар шаҳрҳо, деҳаҳо ва маҳаллаҳои гуногуни Қатиф, дар масҷидҳо, ҳусайнияҳо, хонаҳо ва маҳфилҳои хусусӣ баргузор шудаанд.
Гарчанде ин омор тамоми маҷлисҳои баргузоршударо дар бар намегирад, аммо аз исрор ва пойбандии мардум ба баргузории маросимҳои азодории муҳаррам шаҳодат медиҳад. Суханронон дар шаби аввали муҳаррам бар аҳамияти зинда нигоҳ доштани ёд ва паёми Ошӯро, сарфи назар аз хароҷот ва душвориҳо, инчунин зарурати татбиқи таълимоти ин наҳзат дар ҳаёти иҷтимоӣ таъкид карданд.
Гузоришҳои интишоршуда дар ин замина аз истиқболи густурдаи мардум аз маросимҳои азодорӣ ҳикоят мекунанд, ба гунае ки ҳатто бисёре аз маҷлисҳои хурд аз ҳамон шаби аввал бо ҳузури сершумори азодорон рӯ ба рӯ шуданд. Дар ҳоле ки дар солҳои гузашта чунин издиҳом одатан пас аз шаби чоруми муҳаррам мушоҳида мешуд.
Шиъаёни минтақаи Қатиф дар ҳоле дар маросимҳои моҳи муҳаррам ширкат мекунанд, ки ба гуфтаи манобеи маҳаллӣ, ниҳодҳои амниятии Арабистони Саудӣ барои баргузории ойинҳои муҳаррам маҳдудиятҳое ҷорӣ кардаанд. Аз ҷумлаи ин тадбирҳо метавон ба барқарор намудани нуқтаҳои бозрасӣ, маҳдуд кардани рафтуомади бархе шаҳрвандон, пешгирӣ аз баргузории баъзе барномаҳои мутамарказ, ҷамъоварии рамзҳо ва парчамҳои азодорӣ аз ҷойҳои умумӣ ва маҳдудият барои таъсиси баъзе истгоҳҳои пазироӣ ишора кард.
Дар муқобили ин маҳдудиятҳо ва чолишҳое, ки аз ҷониби мақомот ба вуҷуд омадааст, ташкилкунандагони маросим ва фаъолони мазҳабӣ кӯшиш кардаанд, ки бо истифода аз роҳҳои ҷойгузин, аз ҷумла баргузории маҷлисҳо дар фазоҳои хусусӣ, насби парчамҳо дар кӯчаҳои дохилӣ ва истифода аз платформаҳои маҷозӣ, ойинҳои муҳаррамро идома диҳанд. Дар ҳамин замина, беш аз 100 пахши мустақими интернетӣ аз маҷлисҳои азодорӣ тавассути платформаҳои онлайн роҳандозӣ шудааст.
4359031