Qətərdə şagirdlər üçün təşkil olunan yay Quran kursuna böyük maraq göstərilib
“Əl-Rayə” xəbər agentliyinin məlumatına görə, “Quranda bacarıq” adı altında keçirilən bu kurs yay tətili müddətində Allahın kitabını təkrar etmək və ya Quranı tamamlamaq istəyən müxtəlif yaş qruplarından olan şəxslər üçün iki ixtisaslaşdırılmış mərkəzdə təşkil olunub.
Kurslar Əbu Hamur bölgəsində yerləşən Cassim Dərviş Fəxru Mərkəzi Məscidi və Həzm əl-Mərxiyə bölgəsindəki Məhəmməd bin Əbdül-Əziz Ali Sani Mərkəzi Məscidində keçirilir.
Bu kursun keçirilməsində məqsəd yay tətilindən istifadə edərək şagirdlərin elmi, tərbiyəvi və əxlaqi səviyyələrini artırmaq və onları Quranla daha da əlaqələndirməkdir. Nazirlik, həmçinin uşaqlara düzgün oxunuşun əsaslarını öyrətmək məqsədilə “Əbcəd” adlı xüsusi kurs da daxil olmaqla müxtəlif proqramlar təşkil etmişdir.
Məhəmməd bin Əbdül-Əziz Ali Sani Mərkəzi Məscidində keçirilən “Quranda bacarıq” kursunun rəhbəri şeyx Əmr əl-Məliki bu barədə bildirib: “Bu kurs əsasən Quranın əzbərdən təkrarına və düzgün tilavətinə yönəlib və bununla yanaşı tərbiyəvi və əyləncəli fəaliyyətlər də həyata keçirilir.”
O əlavə edib ki, kurs iki hissədən ibarətdir:
Əzbəri təkrar etmək bölməsi – bütöv Quran, 25 cüz, 20 cüz, 10 cüz və 5 cüz təkrarını əhatə edir;
Əzbər və tilavət bölməsi – artıq müəyyən hissələri əzbərləmiş və onlara yiyələnmiş şagirdlər üçündür.
Əl-Məliki onu da qeyd edib ki, bu məsciddə keçirilən Quran kursuna 90 şagird qatılıb və onların yarısı Quran hafizidir.
O əlavə edib ki, bu kurs 13 iyul 2025-ci ildə başlayıb və 13 avqust 2025-ci ilə qədər davam edəcək. Dərslər həftədə dörd gün – bazar ertəsi, çərşənbə axşamı, çərşənbə və cümə axşamları – yerli vaxtla saat 08:00-dan 11:00-dək keçirilir.
4297937
