Ҳунарманди доғистонӣ ва таҷрибаи маънавии китобати Қуръон + видео
Бино ба гузориши икно бо истинод ба «Ал-Ҷазира», Сулаймон Оширлоев, хушнависи доғистонӣ, ки беш аз 35 сол дар санъати хаттотии арабӣ (хушнависии исломӣ) ва ороишоти исломӣ (тазҳиб) таҷриба дорад, тамоми Қуръони Каримро бо даст навиштааст. Ин дастовард дар даҳсолаҳои охир дар ин минтақа амри нодир ба ҳисоб меравад.
Сулаймон, ки дар Доғистон ба сабаби фаъолияти худ дар ороиш ва тазҳиби масҷидҳо маъруф аст, дар маҳфилҳои динӣ ва фарҳангӣ эҳтироми зиёд дорад. Ӯ ба хотири талошҳои чандинсолаи худ дар ҳифз ва рушди санъати хушнависии арабӣ соҳиби ҷоизаҳо ва ифтихорномаҳои маҳаллӣ низ шудааст.
Оширлоев дар суҳбат бо «Ал-Ҷазира» гуфтааст, ки муносибати ӯ бо хушнависии арабӣ аз давраи кӯдакӣ оғоз ёфтааст, замоне ки бори аввал мафтуни шаклу зебоии ҳарфҳо гардид.
Ӯ дар тӯли солҳои фаъолияташ даҳҳо масҷидро дар Доғистон ва дигар минтақаҳо бо ҳунари худ оро додааст ва пеш аз оғози китобати пурраи Қуръон, дар тазҳиби беш аз 100 масҷид саҳм гирифта буд.
Ин хушнавис изҳор дошт, ки қисми зиёди вақти худро барои китобати Қуръон бахшидааст. Ба гуфтаи ӯ, ин кор бо навиштани пайвастаи ҳаррӯза, ба истиснои вақтҳои намоз ва дигар корҳои зарурӣ дар деҳааш, чор моҳу нуздаҳ рӯз идома кардааст.
Вай афзуд, ки бисёре аз мардум нусхаҳои қадимаи Қуръонро барои арзёбӣ назди ӯ меоранд, аммо ба эътиқоди ӯ арзиши воқеӣ дар зебоии хат ва пойбандии хушнавис ба усулҳои ҳунариест, ки устодони хаттотӣ дар тӯли садсолаҳо муайян кардаанд.
Оширлоев тасмим гирифт Қуръони Каримро бо хати сулс, ки яке аз мураккабтарин навъҳои хатти арабӣ ба шумор меравад, китобат намояд. Ин ҳамон хатест, ки барои ороишот ва навиштани оятҳо бар рӯйи пардаи Каъба истифода мешавад.
Ӯ ба «Ал-Ҷазира» гуфтааст, ки интихоби ин навъи хат бо ҳадафи офаридани асаре анҷом шудааст, ки робитаи амиқи мардуми Доғистон ва минтақаи Қафқозро бо Қуръони Карим таҷассум намояд.
4356953
