Бақайдгирии беш аз 13 ҳазору 500 мавкиби хизматрасон ва азодорӣ дар Арбаини Ҳусайнӣ
Ба гузориши икно, ба нақл аз сомонаи Остони Ҳусайнӣ, беш аз 13 ҳазору 500 мавкиб аз дохил ва хориҷи Ироқ аз ҷониби Остони муқаддаси Имом Ҳусайн (а) барои ширкат дар маросими Арбаини имсол ба қайд гирифта шудаанд.
Муҳаммад Карим Азиз, раиси бахши мавкибҳо ва ҳайатҳои ҳусайнӣ, вобаста ба Остони Ҳусайнӣ, дар ин бора гуфт:
«То имрӯз беш аз 13 ҳазору 500 мавкиб аз вилоятҳои мухталифи Ироқ ва инчунин аз бархе кишварҳои арабӣ, исломӣ ва дигар давлатҳо барои хизматрасонӣ ва баргузории маросимҳои азодорӣ дар рӯзҳои зиёрати Арбаини имсола ба қайд гирифта шудаанд.»
Ӯ афзуд, бо дарназардошти он ки ҳанӯз баъзе мавкибҳо ба қайд гирифта нашудаанд, интизор меравад шумораи онҳо аз 16 ҳазор мавкиб бештар шавад.
Муҳаммад Карим Азиз тавзеҳ дод, ки бахши ҳайатҳо ва мавкибҳои ҳусайнӣ ҷадвали ҳаракат ва вуруди дастаҳои азодориро бар асоси низоми муайяне, ки аз ҷониби кумитаи марказӣ бо иштироки Остони муқаддаси Ҳусайнӣ ва Аббосӣ ва ниҳодҳои давлатии марбута таҳия шудааст, эълон кардааст.
Ӯ ҳамчунин изҳор дошт, ки барномаи вуруди дастаҳои азодорӣ мутобиқи вилоятҳо ва кишварҳои гуногун танзим гардидааст, то ҳаракати зоирон ва мавкибҳо дар саҳни мутаҳҳари Имом Ҳусайн (а) ва минтақаи Байналҳарамайн бо тартиб ва осонӣ анҷом шавад.
Муҳаммад Карим Азиз таъкид кард, ки Остони муқаддаси Имом Ҳусайн (а) аз масъулони ҳамаи мавкибҳо ва ҳайатҳо хостааст, дастурамалҳои содиршударо, аз ҷумла маълумоти воситаҳои нақлиёт, андоза ва тавоноии баландгӯякҳо, масирҳои вуруд, ворид шудани дастаҳо танҳо аз дарвозаҳои муайяншуда ва риояи сатҳи баланди интизом ва дақиқиро пурра иҷро намоянд.
Раиси бахши мавкибҳо ва ҳайатҳои ҳусайнӣ таъкид кард, ки ҳадаф аз татбиқи ин қоидаҳо, муаррифии симои воқеӣ ва шоистаи ойинҳои азодории ҳусайнӣ ба ҷаҳониён ва нишон додани сатҳи баланди интизом, ҳамоҳангӣ ва пойбандӣ ба қонунҳо дар баргузории маросимҳои Арбаин мебошад.
Дар доираи ин талошҳои созмондиҳӣ, Остони муқаддаси Имом Ҳусайн (а) ҳамчунон барои фароҳам овардани беҳтарин шароит ҷиҳати пазироӣ аз дастаҳои азодорӣ ва мавкибҳои хизматрасон, таъмини равонии ҳаракати зоирон, ҳифзи эҳтироми маросими динӣ ва муаррифии чеҳраи мутамаддинонаи зиёрати Арбаин ба ҷаҳониён кӯшишҳои худро идома медиҳад.
4365814