Духтари ироқӣ дар 43 рӯз тамоми Қуръонро ҳифз кард

Зайнаб, духтараки навраси ироқӣ, ки дар мактаби миёна таҳсил мекунад, дар иқдоми шоистаи таҳсин тавонист тамоми Қуръони Каримро дар муддати ҳамагӣ 43 рӯз ҳифз кунад.

Ба гузориши икно, ба нақл аз хабаргузории «Нун», дафтари расонаии Вазорати маорифи Ироқ дар баёнияе эълон кард: Абдулкарим Абтон ал-Ҷубурӣ, вазири маорифи Ироқ, аз ин дастовард қадрдонӣ карда, онро намунаи дурахшони ирода, интизом ва тавоноии истифодаи судманд аз вақти донишомӯзони ироқӣ тавсиф кард.

Ал-Ҷубурӣ таъкид кард: низоми таълимӣ аз донишомӯзоне, ки фарогирии илмро бо арзишҳои асил муттаҳид мекунанд, ифтихор мекунад.

Зайнаб донишомӯзи мактаби миёнаи духтаронаи «Хадиҷа» дар Ироқ аст, ки ба далели ҳифзи муваффақонаи тамоми Қуръони Карим дар ҳамагӣ 43 рӯз, бо истифода аз як давраи муваққатан озод шудан аз дарсҳои мактаб ва иҷрои барномаи фишурдаи ҳифзи Қуръон, мавриди қадрдонӣ қарор гирифт.

Дафтари расонаии Вазорати маорифи Ироқ дар баёнияе эълон кард: Муҳаммад Иброҳим Аббудӣ, мудири кулли Раёсати маорифи Найнаво, ин донишомӯзро ба ҳузур пазируфт ва ба нишони қадрдонӣ аз дастоварди ӯ, ҷоизаи пулӣ ба вай тақдим шуд.

Раёсати маорифи Найнаво ҳамчунин ба мактаби миёнаи духтаронаи «Хадиҷа» ба нишони қадрдонӣ аз нақши ин муассиса дар тарбияи донишомӯзони барҷаста, сипоснома тақдим кард.

4368141