Bayar da sabon izini na kona kur’ani a Sweden
Kamfanin dillancin labaran kur’ani na iqna ya habarta cewa, ya nakalto daga shafin sadarwa na yanar gizo na Sedi al-Albad cewa, kamfanin dillancin labaran kasar Sweden TT ya bayar da rahoton cewa, a jiya Litinin, ‘yan sandan kasar sun bayar da izinin shirya kona kur’ani mai tsarki a daya daga cikin dandalin Helsingborg.
Ya kamata a gudanar da wannan biki da tsakar rana a gobe Laraba 12 ga watan Yuli a daya daga cikin manyan filaye na birnin.
A cewar wannan kamfanin dillancin labarai na Sweden, Mathias Siegfridsson, shugaban 'yan sandan yankin Eskin da ke arewa maso yammacin kasar, ya bayyana cikin alfahari cewa, "Za a iya yin wannan mataki cikin aminci da tsaro!"
Tun da farko, kafofin watsa labaru na Sweden sun ba da rahoton cewa 'yan sandan Sweden sun sami buƙatun 3 don shirya zanga-zangar a Stockholm da Helsingborg don kona littattafai masu tsarki.
A cewar tashar talabijin ta SVT ta kasar Sweden, daya daga cikin abubuwan da suka faru shi ne kona kur’ani a gaban masallacin Stockholm, kuma masu neman na son aiwatar da shi cikin gaggawa.
Fard Hatak, wanda ya nemi izinin kona kur’ani a ranar Laraba, mai shekaru 50, ya yi ikirarin cewa, la’akari da cewa zanga-zangar adawa da Sweden ba ta dace ba a duniya, ya yanke shawarar sake kona kur’ani.
Idan dai ba a manta ba, wani dan kasar Iraki mai suna Selvan Momika ya kona kur’ani mai tsarki a ranar Idin Al-Adha a birnin Stockholm fadar mulkin kasar Sweden a gaban babban masallacin wannan birni da ke karkashin kariyar ‘yan sanda.
Bayan kona kur'ani mai tsarki a kasar Sweden, hukumar kare hakkin bil'adama ta Majalisar Dinkin Duniya na shirin tattauna wani daftarin kuduri kan kyamar addini.
Daftarin kudurin da Pakistan ta gabatar a madadin kasashe 57 membobi na kungiyar hadin kan kasashen musulmi, ya bayyana kona kur'ani mai tsarki a birnin Stockholm a watan da ya gabata a matsayin wani aiki na gaba, rashin mutuntawa da kuma tsokana gaba daya, wanda ke yada kiyayya.
