Пешниҳоди Қуръон бо забони ишора дар Алҷазоир
Ба гузориши ИКНА ва ба нақл аз "Ал-Наҳор", Юсуф Белмаҳдӣ, вазири корҳои диниву авқофи Алҷазоир, дар суханони худ дар ҳошияи семинари миллӣ бо унвони «Тақвияти ҳувияти динӣ ва миллӣ бо қироати саҳеҳи Имом Бухорӣ ва Имом Молик (аз уламои бузурги аҳли суннат)» изҳор дошт: "Мо барои пешниҳоди Қуръон бо забони ишора барои бародарони гӯшношунаво кӯшиш мекунем ва сураҳои аввали Қуръон барои иҷрои ин кор оғоз шудаанд."
Ӯ афзуд: Вазорати корҳои исломии Алҷазоир барои афроди дорои ниёзҳои махсус як қатор иқдомотро анҷом додааст, аз ҷумла чопи "Арбаъини Нававӣ" (аз китобҳои ҳадиси маъруфи аҳли суннат) оғоз шуда, инчунин китобҳои "Фиқҳи мухтасари Имом Хузарии Алҷазоирӣ" ва "Ал-Мухтасар фӣ-л-ибодот" дар марҳилаи чоп қарор доранд.
Белмаҳдӣ ҳамчунин ёдовар шуд: "Шумораи Қуръон-омӯзони мактабҳои қуръонӣ ва завоё (марказҳои анъанавии омӯзиши Қуръон) дар Алҷазоир ба як миллиону дусад ҳазор нафар расидааст ва ин теъдод дар таътилоти тобистона афзоиш хоҳад ёфт."
Бар асоси ин гузориш, дар семинари миллӣ барои тақвияти ҳувияти динӣ Шамсуддин Ҳафиз, сарпарасти масҷиди Париж, ба таври онлайн тавассути видеоконфронс ширкат дошт. Ҳамчунин, мудирони корҳои диниву авқофи вилоятҳои гуногуни Алҷазоир, имомони ҷамоат ва толибилмони марказҳои тарбияи имомони ҷамоат аз дигар иштироккунандагони ин семинар буданд.
