Оғози бистумин давраи мусобиқоти байналмилалии Қуръон дар Алҷазоир
Ба гузориши ИКНА ва нақл аз sabqpress.dz, маросими ифтитоҳи ин мусобиқот бо роҳбарии президент Абдулмаҷид Таббун ва ҳузури вазири умури дин ва авқоф, Юсуф Белмаҳдӣ, вазири корҳои дохилӣ Иброҳим Мурад ва шуморе аз масъулони давлатӣ ва дипломатҳои муқими Алҷазоир, дар Клуби миллии артиши Алҷазоир баргузор шуд.
Юсуф Белмаҳдӣ, вазири умури дин ва авқофи Алҷазоир, дар суханронии худ зимни маросими ифтитоҳи ин мусобиқот изҳор дошт: "Ин мусобиқа дар моҳи Раҷаб бо ҳадафи гиромидошти воқеаи Исро ва Меъроҷи Паёмбар (с) ва дар ростои ҷашнҳои 70-умин солгарди Инқилоби озодихоҳии Алҷазоир баргузор мешавад."
Ӯ афзуд: "Диққати шахсии президенти Алҷазоир ба барномаҳои мухталифи динӣ, нишондиҳандаи таваҷҷуҳи вижаи ӯ ба интишори таълимоти исломӣ ва қуръонӣ, инчунин ҳифзи ҳувияти миллӣ мебошад. Баргузории мусобиқоти байналмилалии Қуръон барои бори 20-ум пас аз ду даҳа рақобат, худ баёнгари ин таваҷҷуҳ аст."
Юсуф Белмаҳдӣ таъкид кард, ки аз оғози баргузории ин мусобиқот то имрӯз, 900 нафар аз ҳофизони Қуръон ва беш аз 30 кишвар бо фиристодани уламои худ дар ҳайати доварон, дар ин мусобиқот ширкат варзидаанд.
Рақобатҳои асосии ин мусобиқот аз имрӯз, оғоз мешаванд ва то рӯзи шанбе идома хоҳанд ёфт. Маросими ҷамъбаст ва тақдими ҷоизаҳо ба ғолибон рӯзи якшанбе, 26-уми январ баргузор хоҳад шуд. Дар ин маросим, се нафари барҷастаи бахшҳои гуногуни мусобиқот эътироф ва қадрдонӣ мешаванд.
Дар марҳилаи муқаддамотии ин мусобиқот намояндагони 46 кишвари арабӣ ва исломӣ ширкат доштанд, ки аз миёни онҳо 20 нафар (аз ҷумла мардон ва занон) ба марҳилаи ниҳоӣ роҳ ёфтанд.
Дар ҳамин ҳол, Али Ғуломозод, ҳофизи кулли Қуръон аз устони Занҷон ва намояндаи Ҷумҳурии Исломии Эрон дар ин мусобиқоти байналмилалӣ, рӯзи якуми баҳман барои иштирок дар марҳилаи ниҳоӣ ба Алҷазоир сафар кард.
