Довари 41-умин давраи мусобиқоти байналмилалии Қуръон: Садои хеле баланд оромиши қироатро коҳиш медиҳад
Ҳола Фирӯзӣ яке аз доварони бахши савти 41-умин давраи мусобиқоти байналмилалии Қуръони Ҷумҳурии Исломии Эрон мебошад. Хабарнигори ИКНА-и Хуросони Разавӣ дар робита ба ҷараёни мусобиқот, нуқсонҳо ва нерӯмандии ширкаткунандагон бо ӯ мусоҳибае анҷом додааст, ки фишурдаи онро дар идома мехонед:
ИКНА – То имрӯз сифати қироатҳо чӣ гуна буд ва нуқсонҳо ва нерӯмандии қориёнро чӣ тавр арзёбӣ мекунед?
Хушбахтона, то кунун сифати қироатҳо, бахусус дар бахши тадвир, хуб ва болотар аз интизориҳои мо буд. Ширкаткунандагон нисбат ба ду соли гузашта бо ойинномаи мусобиқот бештар ошно шудаанд, ки ин масъала дар раванди баҳогузории онҳо таъсири мусбат гузоштааст. Аммо аз ҷумлаи нуқсонҳо метавон гуфт, ки бархе ширкаткунандагон аз фазоҳои гуногуни тавлиди садо огоҳии кофӣ надоранд, ки ба назари ман, як ёдоварии кӯчак метавонад дар имтиёзи онҳо таъсиргузор бошад. Ширкаткунандагони кишварҳои арабӣ, монанди Сурия ва Лубнон, аз садоҳои хуб бархӯрдор ҳастанд, аммо мутаассифона, бархе аз онҳо ба далели ноошноӣ бо ойиннома имтиёзи поин мегиранд. Дар бахши лаҳн низ яке аз мушкилоти мавҷуд дар миёни ширкаткунандагон ин буд, ки бонувон бештар бо усули таҳқиқ қироат мекарданд, ки ин сабаби коҳиши зиёди имтиёзи онҳо мешуд.
ИКНА – Оё ҷуғрофиё ва маҳалли зиндагӣ дар навъ ва сифати тиловат таъсиргузор аст?
Дар бахши савт метавон гуфт, ки манотиқе, ки аз иқлими баҳри Миёназамин ва ҳавои намнок бархӯрдор ҳастанд, садои беҳтар доранд. Аммо ба таври куллӣ, муҳимтарин омиле, ки дар сифати қироат таъсир дорад, синфҳои омӯзишӣ мебошанд. Ба назар мерасад, ки бархе кишварҳо аз назари доштани ин гуна синфҳо заиф ҳастанд ва ин масъала ба таври чашмгир дар тиловати ширкаткунандагон таъсир гузоштааст.
Қуръон бояд ба тавре қироат шавад, ки дар шунавандагон оромиш эҷод кунад. Аммо мутаассифона, бархе ширкаткунандагон бо дараҷаи савтии хеле баланд тиловат мекунанд, ки ин боис ба коҳиши тумаънина (оромиш)-и қироат мегардад. Ҳамчунин, бештари ширкаткунандагони кишварҳои африқоӣ бо дараҷаи савтии миёна рӯ ба поин тиловат мекунанд, ки ин низ яке аз нуқсонҳои бузурги онҳо шумурда мешавад.
