Ояти 22-и сураи Бақара, илҳомбахши меъмории масҷиди Ҳамидияи Туркия + Филм
Ба гузориши ИКНА аз нақли Анатолия, ороишоти дохилии масҷиди Муҳаммад Мармари Ҳамидия (Mehmet Mermer Hamidiye), ки дар Киршеҳир сохта шудааст, диққати меҳмононро ҷалб мекунад.
Ин масҷид соли 1910 дар масоҳати хурде барои сокинони маҳалла сохта шуда буд, аммо бо афзоиши шумори намозгузорон васеъ гардид.
Соли 2015 масҷид тахриб ва дубора сохта шуд. Меъморон ҳангоми бозсозии он кӯшиш карданд, ки масҷидеро бунёд кунанд, ки намозгузоронро ҷалб намуда, онҳоро ба Худованд наздиктар гардонад. Аз ҳамин сабаб, деворҳои дохилии масҷид бо баъзе аз оятҳои Қуръон зебу зинат дода шудаанд.
Меъморон бо илҳом аз ояти 22-и сураи Бақара ин масҷидро тарроҳӣ карданд:
الَّذِي جَعَلَ لَكُمُ الْأَرْضَ فِرَاشًا وَالسَّمَاءَ بِنَاءً وَأَنْزَلَ مِنَ السَّمَاءِ مَاءً فَأَخْرَجَ بِهِ مِنَ الثَّمَرَاتِ رِزْقًا لَكُمْ فَلَا تَجْعَلُوا لِلَّهِ أَنْدَادًا وَأَنْتُمْ تَعْلَمُونَ
"(Худо) ҳамон зоте аст, ки заминро барои шумо фарш ва осмонро боми афрохта қарор дод ва аз осмон обе нозил кард, пас ба василаи он аз меваҳои гуногун барои шумо рӯзӣ берун овард. Пас, барои Худо андод (шарикон) қарор надиҳед, дар ҳоле ки худ медонед (ки барои Худо дар офариниш ва рӯзӣ додан, ҳеҷ шарике нест)." (Бақара, 22)
Наққошони озарбойҷонӣ, бо илҳом аз ин оят, тасвире аз як боғро дар даромадгоҳи масҷид кашидаанд ва миёни тирезаҳо низ нақши дарахтони санавбар ҳаккокӣ шудааст. Пушти меҳроб ба шакли обшор тарроҳӣ шудааст ва сақфи масҷид ба сурати абр ва осмон тасвир шудааст. Лафзи Ҷалолаи (الله) низ дар девори берунии масҷид нақш бастааст.
Фарши сабзи масҷид, он ҷоеро ба як боғи зебо табдил додааст.
Имоми масҷиди Ҳамидия, дар бораи он гуфт: "Ҳангоме ки маро барои имоматӣ дар ин масҷид таъйин карданд, сабаби тарҳи дохилии онро пурсидам ва фаҳмидам, ки он бо илҳом аз Қуръон сохта шудааст. Ҳар вақте барои намоз ба масҷиди Ҳамидия меоям, чунин эҳсос мекунам, ки гӯё дар яке аз боғҳои биҳишт намоз мегузорам."
