Бозсозии масҷидҳо ва калисоҳо, роҳи муқобила бо барномаи даҳшатноки Трамп барои Ғазза
Ба гузориши ИКНА, Вазорати авқофи Ғазза ба тозагӣ дар гузорише эълом кард: 60% масҷидҳо дар натиҷаи ҳамлаҳои режими саҳюнистӣ дар ҷанги Ғазза осеб дидаанд ва низомиёни артиши саҳюнистӣ бо боло рафтан аз вайронаҳои масҷидҳо ба ин маконҳои ибодатӣ беҳурматӣ мекунанд.
Дар ин гузориш омадааст: мушакҳо ва бомбаҳои режими ишғолгар 604 масҷидро комилан ва беш аз 200 масҷидро тахриб кардаанд.
Аз сӯи дигар, Доналд Трамп, раисиҷумҳури Амрико ахиран эълом кард, ки мардуми Ғазза бояд ин минтақаро тарк кунанд, то Ғазза ба як минтақаи гардишгарӣ табдил дода шавад.
Рӯзномаи "Гардян" дар ёддоште ба қалами Роҷа Шаҳода дар ин бора навишт:
Шояд барои наҷоти хонаҳое, ки мардуми Ғазза дар он зиндагӣ кардаанд ва хотираҳое, ки дар он ҷо эҷод шудаанд, дер шуда бошад, аммо дар шароити тахриби ғайри қобили тасаввури манзилҳо ва нобудии ҳазорҳо зиндагӣ, зеҳнам ба тахриби мероси фарҳангии Ғазза, мисли масҷиди бузурги Умарӣ, мутаваҷҷеҳ мешавад, ки дар қарни ҳафтуми мелодӣ сохта шуда ва ба масҷиди бузурги Ғазза низ маъруф аст.
Бар асари ҳамлаҳои Исроил манораи ин масҷид вайрон шуд ва бахшҳое аз бинои он сахт осеб дид. Ё калисои таърихии православии юнонии Сан- Перфориус, ки яке аз қадимтарин калисоҳои ҷаҳон аст ва бар асари исобати мушакҳои Исроил тахриб шудааст.
Ин воқеият, ки ба бозсозии онҳо таваҷҷуҳ намешавад, танҳо ба ин нукта ишора мекунад, ки чи қадар ба осонӣ пазируфта шудааст, ки фаластиниҳо дар Ғазза мардумоне нестанд, ки шоистаи ҳифзи мероси худ бошанд, балки гурӯҳе ҳастанд, ки метавон ба осонӣ онҳоро нодида гирифт.
Эъломияи Доналд Трамп барои кӯчонидани мардуми Ғазза идомаи сиёсати Бинёмин Нетаняҳу барои тахриби Навори Ғазза аст, ки дар 16 моҳи гузашта дунбол шудааст.
Ин ки ҳамаи ҷиноятҳои анҷомшуда дар Ғазза бояд фаромӯш ва бидуни ҷазо раҳо шаванд, он гуна ки Трамп тавассути барномаи табдили Ғазза ба минтақаи гардишгарӣ дар назар гирифтааст, ваҳшатнок ва бисёр дарднок аст.
Ин барнома ҳамчунин ҳушдордиҳанда аст, зеро поксозии қавмӣ тавассути раҳбари яке аз қавитарин кишварҳои ҷаҳон ба ин соддагӣ ва ба суроғат пешниҳод мешавад.
Аз назари Нетаняҳу, чунин иқдом ба ин маъност, ки тамоми ҷиноятҳое, ки сиёсатҳои ӯ ба он мунтаҳӣ шудааст, бахшида ва фаромӯш мешавад.
Амалӣ шудани пешниҳоди Трамп баъид ба назар мерасад. Бо ин ҳол, то замоне ки Исроил контроли марзҳои Навори Ғаззаро дар ихтиёр дорад ва агар Иёлоти Муттаҳида аз марҳалаи сеюми оташбас ҳимоят накунад, Исроил воқеан метавонад аз ҳар гуна кӯмаки молӣ барои бозсозӣ мамониат кунад ва ҳамчунин аз вуруди маводи лозим барои бозсозии Навор ҷилавгирӣ намояд.
Ин боис мешавад, ки фаластиниҳо дар шароити ғайри қобили таҳаммул зиндагӣ кунанд.
Ин таҳлилгар дар поён менависад: кӯшиши байналмилалӣ барои бозсозии масҷиди бузурги Умарӣ ва калисои Сан- Перфориус нишон медиҳад, ки ҷаҳон талоши Трампро барои табдили сарнавишти фаластиниҳо дар Ғазза ба як тарҳи амлок рад мекунад.
Равиши инсонитар аз табдили Ғазза ба як минтақаи тафреҳии соҳилӣ, бозсозии сабуронаи ин ду бинои таърихии мероси ҷаҳонӣ ҳамчун оғози бозсозии ин минтақаи вайроншуда аст.
Ин як иқдоми рамзии ҷузъӣ барои ҷуброни бахше аз ҷиноятҳоест, ки анҷом шудааст.
