Ҳамос: Ҳеҷ муҳоҷирати дигаре ҷуз ба сӯи Қудс вуҷуд надорад
Ба гузориши ИКНА, ба нақл аз маркази иттилооти Фаластин, Ҳамос дар баёнияе таъкид кард: Озодшавии гурӯҳи шашуми асирони душман нишон медиҳад, ки роҳи озодии онҳо танҳо аз тариқи музокирот ва пойбандӣ ба тааҳҳудоти тавофуқи оташбас имконпазир аст.
Дар ин баёния омадааст: Мардуми мо, уммати Ислом ва озодагон дар саросари ҷаҳон шоҳиди саҳнаҳое аз қудрат, иззат ва сарбаландӣ ҳастанд, ки муқовимат бо анҷоми тавофуқи мубодилаи шарафмандона ба намоиш гузошт. Ин тавофуқ таҷаллои ҳамбастагии мардум ва муқовимати мост.
Ҳамос афзуд: Эй Қудс! Мо сарбозони ту ҳастем. Шоҳид бош, ки бар аҳди худ устуворем, дар майдон собитқадам ҳастем ва дар роҳи озодӣ пеш меравем. Ҳеҷ ақибнишинӣ ва саҳлангорӣ вуҷуд надорад.
Ин ҷунбиш таъкид кард: Ба тамоми ҷаҳон мегӯем: Ҳеҷ муҳоҷирати дигаре ҷуз ба сӯи Қудс вуҷуд надорад. Ин посухи мост ба ҳамаи даъватҳои Трамп ва ҳомиёнаш аз қувваҳои истеъмор ва ишғол барои кӯчонидани иҷборӣ ва ҳазфи фаластиниҳо.
Ҳамчунин, хабарнигори шабакаи хабарии Ал-Алам аз Хон-Юнус дар Навори Ғазза таъкид кард, ки майдони таҳвили асирони исроилӣ паёмҳои зиёде дорад, аз ҷумла ин ки ҳушдор дода шудааст: Ҳеҷ муҳоҷирати дигаре аз Ғазза ҷуз ба сӯи Қудси ишғолшуда сурат намегирад.
Вай афзуд, ки ин паёми муҳим ба раёсати ҷумҳурии Амрико ва ҳамаи касоне, ки дар бораи кӯчонидани иҷбории аҳолии Ғазза ва оворагиву табъиди фаластиниҳо суҳбат мекунанд, мерасад: "Муҳоҷират аз Ғазза танҳо ба сӯи Қудс сурат хоҳад гирифт."
Имрӯз ҷунбиши Ҳамос се асири саҳюнистиро дар шаҳри Хон-Юнус, воқеъ дар ҷануби Навори Ғазза, ба намояндагони Кумитаи байналмилалии Салиби Сурх таҳвил дод.
