Холид Арн ва 40 соли хидмат дар ҳавзаи фарҳанг ва ҳунари исломӣ ва қуръонӣ
Ба гузориши ИКНА, дар қарнҳои аввали ҳиҷрӣ ва аз замони нахустин халифаҳои Аббосӣ, наҳзати густурдаи тарҷума роҳандозӣ шуд. Ҳайатҳое барои ҷамоварии китобҳо ва навиштаҳои қадими юнонӣ ба Рум, Ҳинд, Эрон, Чин, Марв ва Балх сафар карданд. Марказҳои тарҷума дар бисёре аз шаҳрҳои маъруф, монанди Ҷундишопур ва Бағдод фаъол гардиданд ва ба тарҷумаи асноди юнонӣ пардохтанд. Ҷолиб ин аст, ки дар ҳамин аср ва махсусан дар мактаби Имоми Содиқ (Алайҳиссалом) ва Имоми Боқир (Алайҳиссалом), бидуни ҳеҷ гуна таассуби динӣ, уламои исломӣ, яҳудӣ ва масеҳӣ барои иртиқои илм бо якдигар гуфтугӯ мекарданд.
Нуктаи қобили таваҷҷуҳ дар наҳзати тарҷума, талош ва кӯшиши мутарҷимони ҳар қавм дар тарҷумаи осори худ ба забони арабӣ аст. Яъне ҳар як аз ақвоми мухталиф мекӯшиданд, ки осору ақоиди худро зудтар аз дигарон дар миёни мусалмонон ривоҷ диҳанд. Ин рақобат боис шуд, ки раванди тарҷума дар ҷомеаи исломӣ суръат бигирад.
Ҳамчунин, навиштаҳо ва китобҳои юнонӣ, сурёнӣ, ҳиндӣ ва эронӣ ба дасти мутарҷимоне дода мешуд, ки на танҳо ба он забонҳо тасаллут доштанд, балки гоҳе дар ҳар замина манобеъро нақд ва баррасӣ намуда, ҳатто онҳоро тасҳеҳ мекарданд.
Дар ҳамин росто, шабакаи Ал-Ҷазира бо Холид Арн, мутарҷими маъруфи турк ва фаъоли омӯзишҳои қуръонӣ, гуфтугӯе анҷом додааст.
Холид Арн ва хидматҳои ӯ дар омӯзишҳои қуръонӣ
Холид Арн, мутарҷими турк ва мудири Маркази омӯзиши таърих, ҳунар ва фарҳанги исломӣ (IRCICA), аз шахсиятҳои маъруфест, ки нақши муҳиме дар ҳимояти фарҳанг ва тақвияти гуфтугӯ миёни тамаддунҳои Ховари Миёна ва Осиёи Марказӣ, ба вижа байни забонҳои арабӣ ва туркӣ, ифо кардааст.
Арн раҳбари бисёре аз барномаҳо дар ҳавзаи омӯзишҳои қуръонӣ, таърих ва тамаддуни исломӣ, равобити байни тамаддунҳо ва инчунин бойгонӣ ва мустанадсозии нусхаҳои хаттӣ будааст. Ӯ ҳамчунин муассис ва узви беш аз 15 муассиса ва анҷумани фарҳангӣ ва илмӣ дар кишварҳои мухталифи ҷаҳон аст.
Вай ба чанд забони зиндаи ҷаҳон, аз ҷумла англисӣ, арабӣ ва юнонӣ тасаллут дорад ва метавонад бо забонҳои форсӣ ва славянӣ низ иртибот барқарор кунад.
Иқдомоти қуръонии Холид Арн
Ин мутарҷими турк дар бораи корҳои қуръонии худ изҳор дошт: "Дар солҳои ахир, тарҳи омӯзиши қадимтарин мусҳафҳои ҷаҳонро оғоз кардем. Масалан, нусхаҳое аз Қуръон дар осорхонаи Топқопӣ дар Истанбул, Қоҳира ва Яман вуҷуд доранд, ки ба таври комил дар бораи онҳо таҳқиқ нашудааст".
Вай меафзояд: "Нусхаҳои дигаре аз Қуръон дар масҷиди Ҳусайн (а) дар Қоҳира ва китобхонаи нусхаҳои хаттии Зайнабия вуҷуд доранд. Ҳамчунин, дар Яман нусхаҳое мансуб ба Ҳазрати Алӣ ибни Абӯтолиб (а) нигаҳдорӣ мешаванд. Ман аз масҷиди ҷомеъи бузурги Санъо низ боздид кардам ва дар он ҷо мусҳафҳое пайдо намудам".
Холид Арн мегӯяд: "Мо, мусулмонон, имон дорем, ки Қуръони Карим ҳамон тавр ки нозил шудааст, ба дасти мо расидааст, зеро Худованди Мутаол мефармояд:
إِنَّا نَحْنُ نَزَّلْنَا الذِّكْرَ وَإِنَّا لَهُ لَحَافِظُونَ
"Бе тардид, Мо ин Қуръонро тадриҷан нозил кардем ва ҳатман нигаҳбони он хоҳем буд" (Ҳиҷр: 9).
Пас аз реҳлати Паёмбари Худо (с), мусалмонон Қуръонро ҷамъоварӣ карданд ва дар замони Усмон ибни Аффон нусхаҳое аз Қуръон омода намуда, дар шаҳрҳои мухталиф, монанди Куфа, Басра, Мадина ва Макка тақсим карданд".
Ӯ таъкид мекунад: "Таҳқиқоти мо нишон медиҳад, ки байни нусхаҳои мухталифи Қуръон ҳеҷ ихтилофе вуҷуд надорад ва бархе аз тафовутҳое, ки гоҳе зикр мешаванд, танҳо ба иштибоҳоти котибон бармегарданд".
