Ҳузури 170 қорӣ дар масоҷиди Шорҷа дар моҳи шарифи Рамазон
Ба гузориши ИКНА, ба нақл аз "Шорҷа 24", Абдулло Халифа Ас-Сабусӣ, раиси Идораи умури исломии Шорҷа, дар як нишасти матбуотӣ ҷузъиёти рӯйдодҳо ва барномаҳои моҳи мубораки Рамазони ин иморатро эълом кард.
Ин идора беш аз 20 тарҳ ва барномаро бо ҳамоҳангии ниҳодҳои тахассусии мухталиф роҳандозӣ мекунад. Идораи умури исломӣ дар ин барномаҳо бо Муассисаи Қуръон ва суннати шариф, хайрияи байналмилалии Шорҷа, Академияи Қуръон, Радио ва Телевизиони Қуръони Шорҷа ва Донишгоҳи Ал-Қосимия ҳамкорӣ мекунад.
Ас-Сабусӣ эълом кард, ки 20 масҷиди нав дар оғози моҳи муборак ифтитоҳ хоҳанд шуд, ки дар тамоми ҳошия ва шаҳрҳои ин иморат воқеъ мебошанд.
Ҳамчунин, дар чорчӯби "Барномаи қориёни мумтоз", 170 қории мумтоз дар масоҷиди Шорҷа барои имомати намози Магриб дар моҳи шарифи Рамазон ҳузур хоҳанд дошт. Дувоздаҳ масҷид дар саросари ин иморат мизбони хатми Қуръон хоҳанд буд.
Ас-Сабусӣ таъкид кард, ки барномаи ошноӣ бо қироатҳои мухталифи Қуръон дар масҷиди Ал-Кавсар, воқеъ дар минтақаи Ал-Буданиқ, баргузор мешавад, ки дар он ҳар яке аз даҳ қироати қуръонӣ ба таври сода ва бо истифода аз шеваҳои илмӣ ва амалӣ барои дарки умум тавзеҳ дода мешавад.
Ҳамчунин, барои ташвиқ ва осон кардани ҳифзи Қуръон, дар маҷмӯъ 1487 ҷаласаи суханронӣ дар масоҷид аз ҷониби имомони ҷамоат баргузор хоҳад шуд. Ин ҷаласаҳо бо ҳамкории Муассисаи Қуръон ва суннат ва Идораи кулли умури исломӣ, авқоф ва закот баргузор мешаванд.
Дурсҳои тафсири Қуръон рӯзҳои шанбе ва якшанбе баъд аз намози зуҳр дар тамоми масоҷиди Шорҷа баргузор мегарданд. Ҳамчунин, 23 масҷид барои ҷаласаҳои тасҳеҳи қироати рӯзона баъд аз намози аср интихоб шудаанд.
Вай афзуд: Пас аз намози аср, масоҷиди Шорҷа мизбони беш аз 45,000 дарс ва суханронӣ хоҳанд буд. Илова бар ин, 93 масҷид барои ҷомеаҳои ғайриарабзабон ихтисос дода хоҳад шуд, то дарки онҳо аз арзишҳо ва таълимоти исломӣ таҳким ёбад.
Илова бар ин, маҷмӯае аз барномаҳои мазҳабӣ, ҳамроҳ бо тавлид ва нашри подкастҳои моҳи мубораки Рамазон тавассути шабакаҳои рақамии ин бахш, дар платформаҳои расонаҳои иҷтимоӣ пахш хоҳад шуд.
