Барномаи қуръонӣ барои кӯдакон дар Байнулҳарамайн
Ба гузориши ИКНА ба нақл аз остони Аббосӣ, даври сеюми барномаи қуръонии вижа барои кӯдакон ва навҷавонон бо ҳузури Аббос Мӯсо Аҳмад, муовини Дабири кулли остони Аббосӣ ва Козим Убода, узви Шӯрои мудирияти ин остон ва инчунин шуморе аз масъулони бахшҳои мухталифи остони Аббосӣ ва зоирон дар Байнулҳарамайн ифтитоҳ шуд.
Алоа Ал-Мӯсавӣ, муовини раиси Маҷмаи илмии Қуръони Карим дар суханоне гуфт: "Барои сеюмин сол пайдарпай, Байнулҳарамайн шоҳиди баргузории барномаҳои қуръонии вижа барои кӯдакон аст, ки ба ҳиммати Муассисаи Қуръони Карим Наҷаф Ашраф вобаста ба Маҷмаи илмии Қуръони Карим баргузор мешавад."
Вай афзуд: "Ин барнома барои тақвияти маъорифи қуръонӣ миёни кӯдакон ва навҷавонон ва ошно намудани онҳо бо Қуръони Карим ва Сираи Аҳли байт(а) баргузор мешавад."
Ал-Мӯсавӣ идома дод: "Ин барнома ба муддати 10 рӯз идома хоҳад дошт ва илова бар ҳузури густардаи кӯдакон ва навҷавонон, шоҳиди ҳузури ҷамъе аз зоирон низ хоҳем буд ва фаъолиятҳои гуногун барои ширкаткунандагон пешбинӣ шудааст."
Муҳанд Ал-Миёлӣ, мудири Муассисаи Қуръони Карим Наҷаф Ашраф ва нозири барнома низ гуфт: "Ин барнома шомили бахшҳои гуногун аз ҷумла мусобиқоти қуръонӣ мебошад, ки дорои саволҳое дар бораи Қуръони Карим, Сираи Паёмбар(с), фиқҳ, ақоид ва ахлоқ мебошад. Ҳамчунин бахши наққошӣ низ вуҷуд дорад, ки ширкаткунандагон метавонанд наққошиҳое марбут ба Аҳли байт(а) тасвир намоянд. Илова бар он, суханрониҳои иршодӣ ва бахши ҳифзи хутбаҳо ва васиятҳои Ҳазрати Алӣ(а) дар Наҳҷул-Балоға низ аз дигар бахшҳои ин барнома аст."
Ин барномаи қуръонӣ аз рӯзи даҳуми моҳи мубораки Рамазон оғоз шуда, то 10 рӯз аз соати 20:30 то нимашаб идома хоҳад дошт.
Дар идома тасвирҳои маросими ифтитоҳи ин барнома намоиш дода мешаванд.
