Тақвияти ҳамкории динӣ миёни Косово ва Босния барои рӯёрӯӣ бо чолишҳо
Ба гузориши ИҚНА ба нақл аз Muslims Around the World, Шайх Наим Тернаво, раиси Машихати Исломии Косово дар дидор бо ҳамтои босниягии худ, Шайх Ҳусейн Кавазович, ҳамкориҳои миёни ду ниҳоди динӣ дар заминаҳои тарбиятӣ ва динӣ мавриди баррасӣ қарор дод.
Ин дидор дар чорчӯби сафари муфтии Босния ва Ҳерсеговина ба Косово ва дар раъси як ҳайат анҷом шуд, ки дар он бар таҳкими ҳамкориҳои динӣ ва тарбиятӣ ба манзури беҳбуди сифати зиндагии исломӣ, густариши барномаҳои омӯзиши динӣ ва мубодилаи таҷрибаҳо миёни марказҳо ва мактабҳои исломӣ таъкид гардид.
Муфтии Косово бо ишора ба зарурати ҳифзи ёдгориҳои таърихии муштараки исломӣ ва ёдоварӣ аз ҷиноятҳои нерӯҳои серб алайҳи ду миллат гуфт: “Мардумони Босния ва Косово дар даҳсолаҳои ахир бо талошҳои ҳадафмандона барои тахриби мероси динӣ ва фарҳангӣ аз сӯи душмани муштарак (сербҳо) рӯбарӯ будаанд.”
Шайх Тернаво илова кард: “Мо дар Машихати Исломии Косово алоқаманд ба ҳамкории бародарона бо бародарони худ дар Машихати Исломии Босния ҳастем ва бар ин боварем, ки мероси муштарак ва таҷрибаи муштараки мубориза моро ба ҳам мепайвандад.”
Шайх Ҳусейн Кавазович низ изҳор дошт: “Ончи моро ҳамчун мусалмонон дар минтақаи Балкан болотар аз марзҳои ҷуғрофиёӣ ба ҳам мепайвандад, имон ба арзишҳои исломӣ, талош барои густариши некӣ ва рӯёрӯӣ бо фасод ва ифротгароист.”
Ӯ дар поён бар эҳёи муассисаҳои динӣ, ки дар ҷангҳо осеб дидаанд ва ҳамкории машаихатҳо барои шифо бахшидан ба захмҳои гузашта ва бунёди ояндаи муштарак таъкид намуд.
