Оғози бистумин давраи мусобиқоти байналмилалии қуръонии занон дар Урдун
Ба гузориши ИКНА ба нақл аз рӯзномаи Ал-Дастур, Муҳаммад Ал-Халойла, вазири авқоф, умури исломӣ ва муқаддасоти Урдун, ки аз тарафи Рония Абдуллоҳ, ҳамсари подшоҳи ин кишвар дар маросими ифтитоҳи бистумин давраи мусобиқоти байналмилалии ҳифз ва тартили Қуръон ҳузур ёфта буд, зимни суханоне гуфт: Ин мусобиқаи ҳифзи Қуръон дар ростои таваҷҷуҳи Урдун ба ҳофизони Қуръон ва фаъолиятҳои қуръонӣ баргузор гардидааст.
Ӯ афзуд: Урдун ҳамчунон дар роҳи таваҷҷуҳ ба Қуръон ва ҳофизони он қадам бармедорад ва тамоми имконот ва зарфиятҳои худро дар ин замина ба кор гирифтааст.
Ал-Халойла ҳамчунин изҳор дошт: Дар Урдун 2100 маркази ҳифзи Қуръон, вобаста ба Вазорати авқоф фаъолият мекунанд. Ин ғайр аз созмонҳо ва ҷамъиятҳои қуръониест, ки дар ин кишвар ба омӯзиши Қуръон машғуланд.
Ӯ гуфт, ки Урдун тавассути таълим ва ҳифзи Қуръони Карим аз тариқи марказҳои қуръонӣ, ки дар саросари кишвар паҳн шудаанд, ва ҳамчунин ташкили мусобиқоти маҳалливу байналмилалии ҳифзи Қуръон, таваҷҷуҳи вижае ба Қуръон зоҳир кардааст.
Ӯ таъкид кард, ки ҳимояти маликаи Урдун аз ин мусобиқот нишонгари тааҳҳуди ин кишвар ба тақвияти робитаи духтарони мусалмон бо Қуръони Карим тавассути тиловат ва амал ба он ва рафтори исломист.
Ӯ ба аҳаммияти фаҳми дурусти Қуръони Карим ба гунае, ки дар рафтори амалии мусалмонон таҷассум ёбад, ишора намуда, барои расидан ба хайр ва некӯии миллат тавассути таблиғи арзишҳои адолат, таҳаммул, раҳмат, амр ба маъруф ва наҳй аз мункар ва ҳифзи неъмати амният ва субот таъкид кард.
Ламис Ал-Ҳазим, мудири умури занони Вазорати авқофи Урдун, талошҳои ин вазоратро дар роҳандозии мусобиқоти ҳошимии занона дар тӯли бист сол мавриди таъкид қарор дод ва ёдовар шуд, ки дар мусобиқоти имсола, илова бар Урдун, 44 ширкаткунандаи зан аз 40 кишвари исломӣ ва арабӣ иштирок мекунанд.
Мусобиқоти Урдун яке аз қадимитарин мусобиқоти байналмилалист, ки аз соли 1993 ҳар сол тавассути Вазорати авқоф ва умури исломии ин кишвар ва бо ҳимояти ҳукумат баргузор мешавад. Ин мусобиқот ба ду бахш — миллӣ ва байналмилалӣ барои мардон ва занон тақсим мешавад ва аз замони оғози фаъолият тақрибан 45 ҳазор нафар, зану мард, дар он ширкат кардаанд.
Суганда Рафеъзода, ҳофизи тамоми Қуръон, пас аз баргузории озмуни интихобӣ, ҳамчун намояндаи Эрон барои ҳузур дар мусобиқоти байналмилалии қуръонии занони Урдун муаррифӣ шудааст.
