Таҷрибаи ҳунарманди Ҳолливуд аз дилбастагӣ ба Қуръон
Ба гузориши ИКНА, ба нақл аз USA Today, Вил Смит (Will Smith), ҳунарманди маъруфи амрикоӣ ва барандаи чандин ҷоизаи "Оскар", гуфтааст, ки Қуръонро ба таври комил хондааст ва ин амалро дар ҷараёни як марҳилаи маънавии зиндагии худ анҷом додааст.
Ӯ дар мусоҳиба бо Амру Адиб, шахсияти расонаӣ, дар подкасти "Big Time" гуфт:
«Ман як давраи душворро пушти сар гузоштам ва ба тадаббур дар даруни худ оғоз кардам. Ба хондани тамоми китобҳои осмонӣ пардохтам ва дар моҳи Рамазон Қуръонро хондам. Ин як марҳилаи хос аз ҷустуҷӯи ман барои маънавият дар зиндагӣ буд.»
Ӯ афзуд: «Қуръони Карим бисёр содаву равшан аст ва матолибе, ки дар он омадаанд, хеле фаҳмо ҳастанд. Хондани он боис мешавад, ки ҳар гуна бадфаҳмие дар мавриди он аз байн равад.»
Ҷенифер Грут (Jennifer Grout)
Ҷенифер Грут, хонандаи амрикоие, ки бо барномаи "Arabs Got Talent" машҳур шуд, бо тавоноии худ дар тиловати Қуръони Карим ба забони арабӣ, бо вуҷуди он ки аслан араб нест, тамошобинонро ба шигифт овард. Вай гуфт, ки тиловати Қуръон ба ӯ кӯмак кард, ки чуқурии забон ва фарҳанги арабиро беҳтар дарк намояд.
Ӯ муҳаббати худро ба таҷрибаи омӯхтани Қуръон изҳор кард ва гуфт, ки овоз ва лаҳни қуръонӣ сабаб шуд, ки ба маънавияти исломӣ наздиктар шавад. Ҳамчунин ӯ ба омӯхтани бештари Ислом ва фарҳанги арабӣ оғоз кард.
Моҳиршало Алӣ (Mahershala Ali)
Моҳиршало Алӣ, ҳунарманди амрикоӣ, ки дар ҷавонӣ ба Ислом гаравидааст, ба яке аз чеҳраҳои намоён табдил ёфтааст, ки аз иртиботи амиқи худ бо Қуръони Карим сухан гуфтааст. Ӯ дар мусоҳибаҳои гуногун, ба вижа дар барномаи шабона бо Ҷимӣ Фаллон, изҳор дошт, ки Қуръон нақши муҳимеро дар шаклгирии имони маънавии ӯ дошта, ва боис шудааст, ки робитаи ӯ бо Худо қавитар гардад.
Ӯ гуфт: «Омӯзаҳои Қуръон таъсири мусбат ба зиндагии шахсӣ ва касбии ман гузоштаанд. Қуръон чун раҳнамои ахлоқӣ ба ман кӯмак кард, ки бо чолишҳои зиндагӣ рӯ ба рӯ шавам ва ба оромиши дарунӣ даст ёбам.»
Майк Тайсон (Mike Tyson)
Майк Тайсон, қаҳрамони собиқи бокс, ки дар даҳаи 1990 ба Ислом гаравидааст, дар мусоҳибаҳои зиёде аз таъсири Қуръони Карим ба зиндагии худ гуфтааст. Ӯ таъкид кард, ки Қуръон ба ӯ кӯмак кард, то баъд аз солҳои саршор аз хушунат ва бесарусомонии равонӣ, оромиши ботинӣ пайдо кунад.
Ӯ гуфт: «Ман наметавонам зиндагии худро бидуни Қуръон тасаввур кунам, зеро Қуръон нақши муҳимеро дар ташвиқи ман барои ислоҳи худ ва ҳаракат ба сӯи як роҳи маънавии қавитар доштааст.» Ӯ ҳамчунин афзуд, ки Қуръон манбаи бузурги оромиши равонӣ ва илҳоми маънавист.
Ҷанет Ҷексон (Janet Jackson)
Ҷанет Ҷексон, хонандаи маъруф, дар мусоҳиба бо маҷаллаи Vogue, дар бораи иртиботаш бо Ислом ва таъсири он ба зиндагии худ сухан гуфт. Ӯ баъдан ба Ислом гаравид ва изҳор дошт, ки Қуръони Карим дар тағйири самти маънавии ӯ таъсири қобили таваҷҷӯҳе доштааст.
Ҷексон гуфт: «Ҳар вақте Қуръон мехонам, эҳсоси оромиши ботинӣ мекунам.» Ӯ таъкид кард, ки паёмҳои Қуръон дарки ӯро аз сулҳ ва таҳаммулпазирӣ афзоиш додааст. Вай афзуд: «Ин алоқа ба Қуръон нишон медиҳад, ки чӣ гуна ҳунар ва фарҳанг метавонанд амиқ ба боварҳои маънавии инсон таъсир бигузоранд.»
