Намоиши бузургтарин Қуръони ҷаҳон дар Осорхонаи Макка
Ба гузориши ИКНА ба нақл аз Бувабаи Ал-Айн ал-Ахбория, нодиртарин нусхаҳои Қуръони Карим ва бузургтарин Қуръони ҷаҳон дар як намоишгоҳи доимӣ дар Осорхонаи Қуръони Карим дар Макка, ба унвони бахше аз як таҷрибаи фарҳангӣ ва маънавии беназир дар минтақаи фарҳангии Ҳиро ба намоиш гузошта шудаанд.
Дар минтақаи фарҳангии Ҳиро, дар ҳамсоягии кӯҳи Ҷабалуннур — маконе, ки оятҳои аввалини Қуръони Карим дар он нозил шудааст — Осорхонаи Қуръони Карим мизбони як намоишгоҳи доимист, ки боздидкунандагонро аз саросари ҷаҳон барои ошноӣ бо нусхаҳои нодири Қуръон ва шиносоӣ бо равандҳои такомули хаттӣ ва китобати он дар тӯли асрҳо ҷалб мекунад.
Ин осорхона, ки дар моҳи шарифи Рамазони гузашта ифтитоҳ ёфт, аз сӯи ширкати Самая идора мешавад ва дар домани кӯҳи Нур воқеъ аст. Ҳадафи ин намоишгоҳ пешниҳоди як таҷрибаи фарогири омӯзишӣ дар бораи таърихи Қуръон тавассути маҷмӯае аз нусхаҳои хаттӣ ва намоишгоҳҳои мутаъомил (интерактивӣ) мебошад.
Фавоз ибни Абдуллоҳ ал-Мухарриж, мудири кулли ширкати Самая гуфт, ки ин осорхона назари фарогиреро дар бораи шеваҳои китобат ва ҳифзи Қуръони Карим пешкаш мекунад ва бузургтарин нусхаи Қуръони ҷаҳонро, ки дар толоре хос барои ин мақсад ба намоиш гузошта шудааст, дар бар мегирад. Ҳамчунин дар он нусхаҳои қадимае низ ба намоиш гузошта шудаанд, ки марҳилаҳои такомули хаттотии қуръониро нишон медиҳанд.
Ин осорхона шомили намунаҳои омӯзишӣ мебошад, ба хусус намунаи ғори Ҳиро, ки ба боздидкунандагон имкон медиҳад то муҳите, ки нузули Қуръон дар он оғоз шудааст, тасаввур намоянд. Нусхаҳои таърихӣ дар толорҳое муҷаҳҳаз бо фанновариҳои пешрафта ба намоиш гузошта шудаанд, ки шинохти маърифӣ ва маънавиро тақвият мебахшанд.
Абдулбосит, яке аз боздидкунандагон бо ибрози хушҳолӣ гуфт, ки ин намоишгоҳҳо ба амиқтар шудани дарки аҳаммияти Қуръони Карим кӯмак мекунанд ва нақши онро дар таҳкими арзишҳои исломӣ сутудааст. Фаҳд аш-Шариф, мудири минтақаи фарҳангии Ҳиро низ таъкид кард, ки ин осорхона бо ҳадафи боло бурдани таҷрибаи фарҳангӣ ва мазҳабӣ дар Макка мизбони ҳамаи боздидкунандагон мебошад.
