Омодагии комили вилояти Карбало барои пазироии зоирони Арбаин

Бо наздик шудани маросими Арбаини Имом Ҳусайн (а) ва пешбинӣ шудани ҳузури беш аз 20 миллион зоир, вилояти Карбало тамоми ниҳодҳои хизматрасон ва фанниро ба ҳолати омодабош даровардааст, то зоиронро ба хубӣ қабул кунад.

Тибқи гузориши Иқно, нақл аз Мидл Ист, Аҳмад Мӯсо ал-Ибодӣ, сухангӯи Вазорати барқи Ироқ гуфт:
— Таъмини доимии барқ, расонидани хидматҳои зарурӣ ва амн кардани роҳҳо ва шоҳроҳҳо, яке аз авлавиятҳои асосии ҳукумати марказӣ ва маҳаллӣ мебошад. Ин корҳо бо ҳамоҳангии маҷмааҳои муқаддаси Ҳусайнӣ ва Аббосӣ иҷро мешаванд.

Ба гуфтаи ӯ, Вазорати барқ як нақшаи таъҷилии фарогир роҳандозӣ кардааст, ки дар бар мегирад:

тақсим кардани хатҳои барқ,

насби трансформаторҳои нав,

таъмир ва нигоҳдории шабакаҳои барқ дар дохили Карбало ва роҳҳои асосии ба он овардарасон.

Ӯ таъкид кард:
— Ҳадаф аз ин тадбирҳо таъмин кардани барқи устувор ва сабук кардани фишор ба шабакаҳост — бахусус дар маҳалҳое, ки мардум зиёд ҷамъ мешаванд, дар маконҳои иқомати муваққатӣ, марказҳои тиббӣ ва хаймаҳои хидматрасон (мукабҳо).

Ҳамзамон, ҳукумати маҳаллии Карбало бо ҳамкорӣ бо фармондеҳии амалиёт, вазоратҳои дахлдор ва пуштибонии мустақими муқаддасгоҳҳои Ҳусайнӣ ва Аббосӣ, як силсила нақшаҳои ҳамоҳангшудаи хизматрасонӣ ва амниятӣ дар ҳоли иҷро дорад.

Вилоятҳои дигар — мисли Наҷаф, Васит, Арбил, Киркук ва Мусанно низ бо ирсоли нерӯҳо ва таҷҳизоти лозим, фаъолона дар пуштибонии Карбало саҳм мегиранд, то барои идораи ин издиҳоми бузург ва ниёзҳои он кӯмак расонанд.

Ин омодагиҳо дар ҳолест, ки пешбинӣ мешавад имсол зиёда аз 20 миллион зоир ба Арбаин ҳузур ёбанд. Ин теъдод талаб мекунад, ки дар сатҳи хизматрасонӣ ва амният ҳамоҳангии бисёр баланди ташкилотӣ вуҷуд дошта бошад, то маросим ба оромӣ ва муваффақият баргузор шавад.

Инчунин, Абдулҳамид Шамарӣ, вазири корҳои дохилии Ироқ ва раиси Кумитаи амнияти олии маросимҳои миллиённафарӣ, дастур додааст, ки ҳолати омодагии ниҳодҳои амниятӣ барои таъмини амнияти Арбаин зери назорат ва пайгирӣ гирифта шавад.

4298123