Фаластин аз ЮНЕСКО хост, ки аз Масҷиди Иброҳимӣ муҳофизат кунад
Ба гузориши Алҷазира, Али Зайдони Абузаҳра, узви Кумитаи иҷроияи Созмони Озодии Фаластин (СОФ) ва раиси Кумитаи миллии мероси моддӣ ва ғайримоддии Фаластин, дар як изҳорот пас аз он ки мақомоти режими ишғолгари Исроил дар як конфронс дар саҳни Масҷиди Иброҳимӣ ширкат карданд, аз ҷомеаи байналмилалӣ, хусусан ЮНЕСКО, даъват кард, ки қадамҳои амалӣ барои ҳифзи маконҳои муқаддаси исломӣ ва масеҳӣ бардоранд.
Абузаҳра ҳамчунин хостори поён додан ба таҷовузҳои хунбор болои мероси фарҳангӣ ва таърихии миллати Фаластин, ва иқдомоти боздоранда бар зидди режими ишғолгар ва раҳбарияти он шуд — махсусан ба он хотир, ки Масҷиди Иброҳимӣ дар рӯйхати мероси ҷаҳонии ЮНЕСКО сабт шудааст.
Вай афзуд:
“Баргузории конфронси марбут ба шаҳраксозӣ дар саҳни Масҷиди Иброҳимӣ, як таҷовузи рӯшан ба мероси фарҳангӣ ва мазҳабии миллати Фаластин, ва ангехтани эҳсоси миллионҳо мусулмон дар саросари ҷаҳон мебошад.”
Абузаҳра таъкид кард, ки ин таҷовузҳо, ки бо ҳамкорӣ ва ҳимояти вазирони режими ишғолгар анҷом мешаванд, қисмате аз як сиёсати низомманд барои яҳудисозии маконҳои муқаддас ва аз байн бурдани шахсияти таърихии Фаластин аст.
Ӯ режими ишғолгарро масъули мустақими ҳамаи паёмадҳои хатарноки ин иқдомҳо донист, ки ба гуфтаи ӯ, ҳадаф доранд, моҷарои мавҷудро ба як низои ошкорои мазҳабӣ табдил диҳанд.
Абузаҳра афзуд:
“Мероси моддӣ ва ғайримоддии Фаластин як қисми ҷудонашавандаи ҳувияти башарияти ҷаҳонӣ аст ва ниёз ба ҳимояти ҷиддии байналмилалӣ дорад, то монеи кӯшишҳои ишғолгарон барои таҳриф кардани таърих ва пок кардани хотираи ҷомеаи фаластинӣ шавад.”
Конфронси зиддунақизи ишғолгарон дар саҳни масҷид
Рӯзи гузашта, шаҳракнишинони саҳюнистӣ, бо ҳамроҳии чанд вазири режими ишғолгар, аз ҷумла:
Бецалел Смотриш (вазири молияи ифротгаро),
Урит Струк (вазири шаҳраксозӣ),
Исроил Кац (вазири ҷанг),
як конфронс ба хотири таҷлил аз таъсиси ҳаракати ифротии “Гуш Эмуним” баргузор карданд.
ЮНЕСКО: Масҷиди Иброҳимӣ – мероси Фаластин
Дар моҳи июли соли 2017, Кумитаи мероси ҷаҳонии ЮНЕСКО Масҷиди Иброҳимиро як макони мероси фарҳангии Фаластин эълон кард.
Ин масҷид дар қисмати кӯҳнаи шаҳри Халил (ал-Халил) воқеъ аст, ки таҳти назорати низомиёни ишғолгари саҳюнистӣ қарор дорад. Дар он минтақа тахминан 400 шаҳракнишини яҳудӣ зиндагӣ мекунанд ва 1500 сарбози исроилӣ онҷоро муҳофизат мекунанд.
Таҷовузи таърихӣ ва тақсими масҷид
Дар соли 1994, баъд аз як қатли омми ваҳшиёна, ки аз ҷониби як шаҳракнишини яҳудӣ сурат гирифт ва боиси кушта шудани 29 намозгузори фаластинӣ дар Масҷиди Иброҳимӣ шуд, режими саҳюнистӣ масҷидро тақсим кард:
63 дарсади он ба яҳудиён дода шуд,
37 дарсадаш ба мусулмонон боқӣ монд.
4303347
