Барномаи “Қуръони Ҳодӣ” – ба хотири осон кардани хондану фаҳмидани Қуръон

Барномаи мобилии “Қуръони Ҳодӣ” барои хондан ва тафсири Қуръони Карим як муҳити зебову ҷолибро дар телефон ва планшет фароҳам меорад ва ба корбар як эҳсоси дигарро мебахшад.

Бино ба гузориши ИҚНО, бо зиёд шудани истифодаи технологияҳои рақамӣ, зарурат ба таҳия ва рушд додани барномаҳои қуръонӣ рӯз аз рӯз бештар мешавад. Ин гуна барномаҳо на танҳо дастрасиро ба Қуръон осон мекунанд, балки метавонанд воситаи хубе барои омӯзиш, таҳқиқ ва тадаббур (яъне андешаронӣ) дар оятҳои илоҳӣ бошанд.

Қуръони Ҳодӣ як барномаи махсус барои телефонҳои ҳам Android ва ҳам iOS аст, ки дар мағозаҳои дохилӣ ва хориҷӣ дастраси корбарон шудааст. Ин нармафзор бо диққат ба оромӣ ва таҷрибаи рӯҳонӣ, хондану қироати Қуръонро ба як таҷрибаи сода ва гуворо табдил медиҳад.

Дар ин барнома матни пурраи Қуръони Карим бо тарҷумаҳои гуногуни форсӣ, тафсирҳои маъруф (монанди “Ал-Мизон”, “Намуна” ва “Нур”), қироати тадриҷии оят ба оят бо садои қориҳои гуногун, тарҷумаҳои шунаво (аудио), ва имкони қайдгузорӣ ва ёддоштгузорӣ ба оятҳо ҷой дода шудааст. Ҳамчунин, имкони нусхабардорӣ ва барқарор кардани маълумот ва бахши “Ояти рӯз” низ вуҷуд дорад.

Яке аз бартариҳои муҳими Қуръони Ҳодӣ дар он аст, ки матн, тарҷума ва тафсирҳоро ба таври мукаммал пешниҳод мекунад – чизе, ки дар дигар барномаҳои қуръонӣ камтар дида мешавад. Хусусиятҳои садоӣ, ба мисли қироати тадриҷӣ ва тарҷумаи шунаво, хондан ва азбар кардани Қуръонро барои корбар осонтар мекунад. Имкони шахсӣ кардани барнома бо қайд ва ёддоштҳо, таҷрибаи корбарро боз ҳам беҳтар кардааст.

Дизайни ин барнома ба се асос такя мекунад: содагӣ, равшанӣ ва ҳамоҳангӣ. Ҷиҳати зебоӣ ва рангу тарҳи барнома низ аз нуқтаҳои қавии он аст. Пайвастшавии рангҳо – аз ҷумла кабуд, сабз ва рангҳои нарм (монанди крем) – на танҳо барномаеро зебо мекунанд, балки ба тамаркуз ва кам шудани фишори чашм низ кӯмак мерасонанд.

Гарчи истиқболи хубе аз тарафи корбарон дида шудааст, вале баъзеҳо гузориш доданд, ки дар баъзе версияҳо барнома ногаҳон баста мешавад. Ғайр аз ин, фарқияти мазмунии байни версияҳои форсӣ, англисӣ ва арабӣ метавонад сабаби саргардонии баъзе корбарон шавад.

Дар маҷмӯъ, барномаи “Қуръони Ҳодӣ” як намунаи муваффақ аз кӯшишҳо дар соҳаи пешниҳод кардани мундариҷаи Қуръонӣ дар фазои рақамӣ мебошад, ки метавонад барои ҳар шахси алоқаманд ба қироат, тарҷума ва тафсири Қуръон, як василаи бисёр муфид бошад.

4304284