Ҳайате аз Ал-Азҳар дар Конгресси динҳои Қазоқистон ширкат мекунад

Як ҳайати баландпоя аз Маркази исломии Ал-Азҳар дар маросими ифтитоҳи ҳаштумин Конгресси роҳбарони динҳои ҷаҳонӣ ва суннатӣ, ки дар Қазоқистон баргузор мешавад, ширкат хоҳад кард.

Ба гузориши ИҚНО ба нақл аз Садӣ ал-Балад, ин конгресс рӯзи чоршанбе, 17-уми сентябр (26-уми моҳи шаҳривар) бо ҳузури Қосим-Жомарт Тоқаев, раисиҷумҳури Қазоқистон дар шаҳри Астана — пойтахти кишвар оғоз мешавад. Маркази гуфтугӯи динҳо дар Остона мизбонии ин рӯйдоди дурӯза хоҳад буд.

Аҳмад ат-Таййиб, шайхи Ал-Азҳар ва раиси Шӯрои хирадмандони мусулмон, Муҳаммад аз-Зувейнӣ, муовини Ал-Азҳарро ба ҳайси намояндаи расмӣ барои ширкат дар маросими ифтитоҳ таъйин кардааст. Ӯ роҳбарии ҳайати Ал-Азҳарро дар ин ҳамоиш бар уҳда дорад.

Сайри дигар аз аъзои ҳайати Ал-Азҳар дар ин конгресс иборатанд аз:

Наҳла ас-Саъидӣ – мушовири шайхи Ал-Азҳар дар умури донишҷӯёни хориҷӣ ва раиси маркази рушди таълими донишҷӯёни ғайримисрӣ,

Абдурраҳмон Мӯсо – мушовири шайх дар умури равобити хориҷӣ,

Маҳмуд Сиддиқ – муовини раиси Донишгоҳи Ал-Азҳар дар корҳои таҳсилоти баъдидипломӣ,

Муҳаммад ал-Ҷундӣ – дабири кулли Маҷмаъи таҳқиқоти исломии Ал-Азҳар.

Ширкати Ал-Азҳар дар ин ҳамоиш дар посух ба даъвати расмии раисиҷумҳури Қазоқистон сурат мегирад. Дар давраи гузашта (соли 2022), худи Аҳмад ат-Таййиб ва Папа Франсис, раҳбари собиқи Ватикан, дар он ширкат карда буданд — ки як ҳузури таърихӣ шумурда мешуд.

Конгресси роҳбарони динҳои ҷаҳонӣ ва суннатии Қазоқистон як рӯйдоди байналмилалист, ки пайваста дар Остона баргузор мегардад. Ҳадаф аз он пешбурди гуфтугӯи байни раҳбарони динӣ аст, то мушкилоти иҷтимоӣ, фарҳангӣ ва динӣ дар фазои мусолиматомез баррасӣ шавад.

Дар ин конгресс намояндагони динҳои мухталиф иштирок мекунанд ва дар баробари баҳсҳои расмӣ, барномаҳои рамзӣ низ баргузор мегарданд, ки арзишҳои сулҳ ва ҳамзистиро намоиш медиҳанд.

4305078