Маҳкум шудани режими саҳюнистӣ дар баёнияи хотимавии нишасти Доҳа

Дар баёнияи хотимавии нишасти Доҳа, ҳамлаи режими саҳюнистӣ ба кишвари Қатар сахт маҳкум шуд ва аз талошҳо барои сулҳ пуштибонӣ ба амал омад.

Ба гузориши ИҚНО, нақл аз Ал-Ҷазира, раҳбарони кишварҳои арабӣ ва исломӣ, дар поёни нишасти худ дар Доҳа, ҳамлаи ахири Исроил ба қаламрави Қатарро як амали тарсуёна ва ғайриқонунӣ хонданд, ки ба гуфтаи онҳо, сулҳ ва суботи минтақаро ба таври ҷиддӣ зери хатар мегузорад.

Дар ин баёния таъкид шудааст:
"Ҳамла ба як макони бетараф, ки нақши миёнҷигиро дар буҳрони Ғазза иҷро мекард, на танҳо нақзи ошкори ҳуқуқи байналмилалӣ аст, балки ҷараёни талошҳои ҷаҳонӣ барои расидан ба сулҳро низ ба бунбаст бурдааст."

Сарони кишварҳои исломӣ ва арабӣ ҳамбастагии комили худро бо Қатар эълон карда, гуфтанд:
"Мо аз ҳар иқдоме, ки Қатар барои посух додан ба ин таҷовуз анҷом диҳад, пурра пуштибонӣ мекунем", ва ҳамчунин аз мавқеи оқилонаву оромонаи Қатар дар баробари ин ҳамлаи ногаҳонӣ қадрдонӣ карданд.

Дар ин баёния ҳамчунин омадааст:
"Мо аз талошҳои миёнаравонаи Қатар, Миср ва Амрико барои қатъи таҷовузоти Исроил ба Ғазза ҳимоят мекунем", ва нақши созандаи Доҳа дар таҳкими амнияти минтақа ба таври мусбат арзёбӣ шуд.

Баёния боз ҳам бо радди ҳар навъ баҳонаҷӯии Исроил барои ҳамла, таҳдидҳои такрории он кишвар дар бораи эҳтимоли зарбаҳои нав ба Қатар-ро сахт маҳкум кард.

Иштирокчиён ҳушдор доданд, ки ҳадафи аслии ин ҳамлаҳо заиф кардани нақши миёнҷигарӣ ва идома додани таҷовуз ба Ғазза мебошад. Онҳо таъкид карданд, ки барномаи Исроил барои таҳмили воқеиятҳои нав дар минтақа ва ба хатар андохтани амнияти умумии кишварҳои арабӣ ва исломӣ бояд ҷиддан муқобила шавад.

Ин баёния ҳамчунин:

Сиёсатҳои режими саҳюнистиро, ки ба як фоҷиаи бесобиқаи башарӣ дар Ғазза овардаанд, маҳкум кард,

Ҳар гуна кӯч додани мардуми фаластиниро ғайри қобили қабул хонд,

Ва нисбат ба паёмадҳои хатарноки эҳтимоли тасарруфи қисматҳои заминҳои ишғолшуда аз сӯи Исроил ҳушдор дод.

Дар охир, сарони кишварҳои иштирокчӣ:

Аз талошҳо барои поён додан ба масунияти Исроил аз муҷозот пуштибонӣ карданд,

Бар зарурати ҳамоҳангсозии байналмилалӣ барои мутаваққиф кардани узвияти Исроил дар Созмони Милали Муттаҳид таъкид намуданд,

Ва бо истиқбол аз "Эъломияи Ню-Йорк" дар Маҷмаи Умумии СММ дар бораи роҳи ҳалли ду давлат (Фаластин ва Исроил),

Мухолифати худро ба сӯиистифодаи Исроил аз исломҳаросӣ барои сафед кардани поймол кардани ҳуқуқи инсон изҳор доштанд.

4305243