Иқдоми қонунӣ алайҳи хонандаи ироқие, ки ба Қуръон беҳурматӣ кард
Ба гузориши ИҚНО, ба нақл аз хабаргузории «Шафақ нюс», як манбаи огоҳ рӯзи якшанбеи гузашта гуфтааст, ки Кумитаи мубориза бо мӯҳтавои ғайриахлоқӣ дар Вазорати корҳои дохилии Ироқ зидди ҷалол Аз-Зайн иқдомоти ҳуқуқӣ рӯи даст гирифтааст.
Ҷалол Аз-Зайн дар як консерти зинда оятҳо аз сураи Фалақ-ро хонд ва ба баҳонаи ташбеҳ, калимаҳояшро таҳриф кард. Ин амал боиси вокунишҳои шадиди блогнависони ироқӣ дар шабакаҳои иҷтимоӣ шуд. Онҳо ин рафторро ҳамчун беҳурматӣ ва таҳқири Қуръон донистанд.
Аз моҳи феврали соли 2023 то ҳол дар Ироқ як қатор иқдомоти ҳуқуқӣ, аз ҷумла барориши ҳукмҳои боздошт ва ҳабс алайҳи афроде, ки муттаҳам ба нашри мӯҳтавои номаҷоз ҳастанд, амалӣ шудаанд.
Вазорати корҳои дохилии Ироқ ҳамчунин платформаи "Баллиқ" (хабар диҳед)-ро роҳандозӣ кардааст, ки тавассути он мардум метавонанд мӯҳтавои беэҳтиромона ва хатарнокро гузориш диҳанд. Ба гуфтаи мақомот, ҳазорон гузориш тавассути ин платформа ворид шудааст.
Дар айни замон, дар баъзе кишварҳо қонунҳое мавҷуданд, ки беҳурматӣ ба муқаддасотро ҷиноят мешуморанд.
Аз соли 2012 ба ин сӯ, тақрибан 33 кишвар дар қонунгузории худ намудҳои гуногуни қонунҳои зидди таҳқири муқаддасотро ҷой додаанд. Аз ин миён, 21 кишвар мусалмоннишин ҳастанд, ки аз ҷумлаи онҳо инҳоянд: Афғонистон, Алҷазоир, Баҳрайн, Миср, Индонезия, Эрон, Урдун, Кувайт, Лубнон, Малайзия, Молдив, Марокаш, Умон, Покистон, Қатар, Арабистони Саудӣ, Сомалӣ, Судон, Туркия, Аморати Муттаҳидаи Араб ва Саҳрои Ғарбӣ.
4306346
